ހުރިހާ ޒުވާނުންވެސް މިއަދު ވިސްނަންވީ، މިހާރު ހޭދަކުރަމުންދަނީ އުމުރުގެ އެންމެ އަގުބޮޑު ދުވަސްވަރުކަމުގެ ގޮތުގައި ހަދަން ކަމަށް ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ކުޅުދުއްފުށި ސިޓީގައި މިރޭ ބޭއްވި ޒުވާނުންގެ ދުވަހުގެ ރަސްމީ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، އެމީހެއްގެ ހަޔާތުގެ ކުރިމަގު ބާއްޖަވެރިކަމުގެ މަތީގައި ބިނާކުރެވޭނީ، ޒުވާން އުމުރުގައި އަޅާ ބިންގާ ސީދާކުރި މިންވަރަކުން ކަމަށެވެ. އަދި ރާއްޖޭގެ ކޮންމެ ޒުވާނެއްގެ ކިބައިގައި ވެސް ތަފާތު ހުނަރުތަކަކާއި ތަފާތު ގާބިލުކަމެއް ހުންނާނެ ކަމަށާއި ގައުމު މިއަދު އެދި ގޮވަނީ ޒުވާނުންގެ ކިބައިގައި ހުރި ހުނަރާއި ފަންނުވެރިކަމުން، އަދި އުފެއްދުންތެރި ވިސްނުންތަކުން ގައުމަށް ކުރިއެރުން ހޯދައިދިނުމަށް ކަމަށެވެ.
ރައީސް ވިދާޅުވީ ދެއަތް އުރާލައިގެން ތިބި، ވަރަށް ގިނަ ޒުވާނުންތަކެއް މިހާރުވެސް އެބައުޅޭ ކަމަށާއި ހަމައެއާއެކު ރާއްޖޭގެ މަސައްކަތުގެ ބާޒާރުގައި ވަރަށް ގިނަ އަދަދެއްގެ ބިދޭސީން ވެސް ހަރަކާތްތެރިވާ ކަމަށެވެ. މިއިން އެނގެނީ މަސައްކަތެއް ނުކޮށް ޒުވާނުންތަކެއް ތިއްބަސް، މަސައްކަތު ބާޒާރުގައި ތަފާތު ފުރުސަތުތައް އެބަހުރިކަން ކަމަށް ރައީސް ވިދާޅުވިއެވެ.
މިއީ ޒުވާނުން މިހާރަށް ވުރެ ސީރިއަސް ގޮތެއްގައި ވިސްނަން ޖެހިފައިވާ ކަމެއް ކަމަށް ރައީސް ވިދާޅުވިއެވެ.
