މިނިވަން މުއައްސަސާތަކަށް މިހާރު ސަރުކާރުން ނުފޫޒުނުފޯރުވާ ކަމަށާއި، މީޑިއާގެ ފުރިހަމަ މިނިވަންކަން އެބައޮތް ކަމަށް އެމްޑީޕީން ބުނެފިއެވެ.
ރައީސުލްޖުމުހޫރިއްޔާ އިބްރާޙިމް މުހައްމަދު ސާލިހުގެ ވެރިކަމަށް ތިން އަހަރު ފުރުމާ ގުޅިގެން އެމްޑީޕީން ނެރެނު ބަޔާނެއްގައި ބުނެފައިވަނީ، ސަރުކާރަށް ތިން އަހަރު މިއަދު ފުރުނުއިރު ސިޔާސީ ހަރަކާތްތަކަށް ފުރިހަމައަށް ޖާގަދެވިފައިވާ ކަމަށާއި، ރައްޔިތުން ބާރުވެރިކުރުވައި ލާމަރުކަޒުކުރުމަށް ބޮޑެތި އިސްލާހީ ބަދަލުތަކެއް އައިސްފައިވާ ކަމަށެވެ.
އަދި ރައްޔިތުންގެ އުންމީދުތައް އަދިވެސް ގުޅިފައިވަނީ އެމްޑީޕީއާއި އެ ޕާޓީގެ ވެރިކަމާ ކަމަށް މި ބަޔާނުގައި ބުނެފައިވެއެވެ. ރައީސް ސާލިހުގެ ވެރިކަމުގައި ގެނައި ބަދަލު ތަކުގެ ތެރޭގައި އަނިޔާވެރިކަން އިސްކުރުން ނިމުމަކަށް ގެނެވިފައިވާ ކަމަށާއި، ޑިމޮކްރަސީއާއި ގާނޫނުގެ ވެރިކަމަށް އިސްކަންދިނުމާއި ހެޔޮވެރިކަމުގެ ނިޒާމެއް ގާއިމުކޮށްފައިވާ ކަމަށް އެ ޕާޓީން ބުނެފައިވެއެވެ. އަދި އަލަށް އައު ސުޕްރީމް ކޯޓެއް އެކަށައަޅައި ޖުޑީޝަރީއަށް ހެޔޮ ބަދަލުތަކެއް ގެންނަމުން އަންނަ ކަމަށްވެސް އެ ބަޔާނުގައި ވަނީ ބުނެފައެވެ.
ރައީސް ސާލިހުގެ ސަރުކާރަށް މަރުހަބާ ކިޔަމުން ބުނެފައިވަނީ ކޮވިޑުގެ ސަބަބުން ކުރިމަތިވި ގޮންޖެހުންތަކާއެކުވެސް ވަރަށް ހަލުއިކަމާއެކު ސަރުކާރުން މަޝްރޫއުތައް ހިންގައި އަސާސީ ހިދުމަތްތައް ފޯރުކޮށްދިނުމުގެ މަސައްކަތްކުރަމުންދާ ކަމަށެވެ.
