އަނެއްކާވެސް ސީލައިފް ފްލެޓް ގަތް މީހުންނަށް "ވިނަރެސް" ފްލެޓް ގަތުމުގެ މުއްދަތު އެޗްޑީސީން އިތުރުކޮށްދީފިއެވެ.
ހައުސިން ޑިވޮލޮޕްމަންޓް ކޯޕަރޭޝަނުން ސީލައިފްއިން ފްލެޓް ގަތުމަށް ފައިސާދެއްކި މީހުންނަށް ސަރުކާރުގެ ހައުސިން ޕްރޮޖެކްޓް "ވިނަރެސް"އިން އެޕަރޓްމަންޓް ގަތުމުގެ ފުރުސަތު ހުޅުވާލީ 19 އޮކްޓޫބަރުގައެވެ. ސީލައިފް ގްލޯބަލް އިންކް ޕްރައިވެޓް ލިމިޓެޑާ ޙާވާލުކޮށް 3000 ހައުސިންގ ޔުނިޓްގެ މަޝްރޫޢެއް ސަރުކާރުން އިއުލާންކުރީ 2016ވަނަ އަހަރު ރައީސް ޔާމީންގެ ވެރިކަމުގައެވެ.
މިމަޝްރޫއުގެ ދަށުން ފްލެޓް ގަތުމަށް ގިނަ ބަޔަކު އޭރު ފައިސާ ދެއްކި ނަމަވެސް ގިނަ ދުވަސްތަކެއްވެ މަސައްކަތް ހިނގަމުން ނުދިއުމުގެ ސަބަބުން ގިނަ ބަޔަކަށް ވަނީ ބޮޑެތި ގެއްލުންތަކެއް ވެފައެވެ. "ވިނަރެސް"އިން އެޕާޓްމަންޓް ގަތުމަށް މިދިޔަ މަހުގެ 28ވަނަ ދުވަހަށް ހުޅުވާލި މުއްދަތު މިހާރު އެޗްޑީސީން ވަނީ މިމަހުގެ 6ވަނަ ދުވަހުގެ ނިޔަލަށް އިތުރުކޮށްފައެވެ.
އެޗްޑީސީން ބުނީ މިމުއްދަތު އިތުރު ކުރަން ޖެހުނީ ގިނަ ފަރާތްތަކަށް ރަޖިސްޓްރީ ކުރުމަށް ދެވުނު މުއްދަތުގައި ރަޖިސްޓްރީ ނުކުރެވުނު ކަމުގެ ޝަކުވާ ލެބެމުންދާތީ ކުރިން ރަޖިސްޓްރީ ކުރުމަށް ހުޅުވާލި ފުރުސަތުގައި ރަޖިސްޓްރީ ނުކުރެވުނު ފަރާތްތަކަށް އެފުރުސަތު ދިނުމުގެ ގޮތުން ކަމަށެވެ.
