އަންނަ ޖެނުއަރީ މަހުން ފެށިގެން އިތުރު ތިން މަސް ދުވަހު ހިޔާ ފްލެޓުތަކުގެ ކުލި ނުނަގަން ރައީސް އިބްރާހިމް މުހައްމަދު ޞާލިހު ނިންމަވައިފި އެވެ.
ރައީސް މިކަން އިއުލާން ކުރެއްވީ އާދިއްތަ ދުވަހުގެ ރޭ ބޭއްވި އެއްބައިވަންތަކަމުގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ. އެގޮތުން ރައީސް ވިދާޅުވީ ސަރުކާރުން އަބަދުވެސް މަސައްކަތް ކުރާނީ، ރައްޔިތުންގެ އަޑުއަހައި، ރައްޔިތުން އެދޭގޮތަށް ކަންކަން ފުރިހަމަކޮށްދޭން ކަމަށެވެ. މި ވަގުތަށް ބަލާއިރު، ހިޔާ ފްލެޓުތަކަށް ދިރިއުޅުން ބަދަލުކުރާ މީހުންގެ ކަންބޮޑުވުންތަކާއި ޝަކުވާތަކެއް އެބަހުރިކަމަށާއި ސަރުކާރުން އެކަންކަން ހައްލު ކޮށްދޭން މަސައްކަތް ކުރަމުންދާކަމަށެވެ.
ހިޔާ ފްލެޓުތަކުގެ ވެރިންނަށް މިވަގުތު ދިމާވެފައިވާ އެންމެ ބޮޑު ދައްޗަކީ، ފްލެޓުތަކުގައި ދިރިއުޅެން ފެށޭވަރު ނުވަނީސް، ކުލި ދައްކަން ފަށަން ޖެހުންކަން ރައީސް ފާހަގަކުރެއްވި އެވެ. އަދި ވިދާޅުވީ ހިޔާ ފްލެޓުތަކުގެ އެތެރޭގެ މަސައްކަތްތައް ނިންމަން ދިން ތިންމަސް ދުވަސް، މި މަހުގެ ނިޔަލަށް ނިމޭނެކަމަށާއި އެހެންނަމަވެސް އެކި ސަބަބުތަކާއި ހުރެ އެމުއްދަތުގައި މަސައްކަތްތައް ނިންމާލައި އެތަންތަނުގައި ދިރިއުޅެވޭވަރު ވެފައިނުވާ ކަމަށެވެ.
މިކަމަށް އިތުރު ލުޔެއް ދިނުމުގެ ގޮތުން، ސަރުކާރުން މިހާރު ނިންމާފައި މިވަނީ، ފްލެޓުތައް ނިންމުމަށްޓަކައި، ކުލި ނުނަގައި، އިތުރު ތިން މަސްދުވަސް، ފްލެޓުތަކުގެ ވެރިންނަށް ދޭން.
- ރައީސް އިބްރާހިމް މުހައްމަދު ޞާލިހު
ރައީސް އިބްރާހިމް މުހައްމަދު ޞާލިހު އެއްބައިވަންތަކަމުގެ ދުވަހުގެ ޖަލްސާގައި ވާހަކަފުޅު ދައްކަވަނީ
ރައީސް ވިދާޅުވީ މާޗު މަހުގެ ނިޔަލަށް ނުނިމިހުރި ފްލެޓުތަކުގެ މަސައްކަތްވެސް މުޅިން ނިންމައި އެފްލެޓުތަކުގައި އެންމެންނަށްވެސް ދިރިއުޅެވޭވަރު ވާނެކަމަށް އުއްމީދުކުރައްވާކަމަށެވެ. މީގެ އިތުރުން އެއްބައިވަންތަކަމުގެ ދުވަހާއި ގުޅޭގޮތުންވެސް ރައީސް ވާހަކަފުޅު ދެއްކެވި އެވެ. އެގޮތުން ވިދާޅުވީ އެއްބައިވަންތަކަން ދެމެހެއްޓުމަކީ ސަރުކާރުގެ އެންމެ އިސް އެއް ސިޔާސަތުކަމަށެވެ. އެހެންކަމުން އެސިޔާސަތު ދެމެހެއްޓުމަށް ސަރުކާރުން އަބަދުވެސް ރައްޔިތުންގެ އަޑު އަހާނެކަމަށް ރައީސް ވިދާޅުވި އެވެ.
ސަރުކާރެއް އޮތުމުގެ ބޭނުމަކީވެސް އެއީ. ސަރުކާރެއްގެ ގޮތުގައި މަސައްކަތް ކުރުމަކީ، އެ ދައުލަތެއްގައި ޝާމިލުވާ އެންމެންގެ އަޑުއަހައި، އެންމެންގެ ކަންބޮޑުވުންތަކަށް ޙައްލު ހޯދައިދޭން މަސައްކަތް ކުރުން.
- ރައީސް އިބްރާހިމް މުހައްމަދު ޞާލިހު
ހިޔާ ފްލެޓުތަކުގެ ކުލި ދައްކަން ނުޖެހޭ މުއްދަތު އިތުރު ތިންމަސް ދުވަހަށް އިތުރުކުރިއިރު، ފްލެޓުތަކުގައި ދިރިއުޅޭ ފަރާތްތަކުން ވަނީ އެކަމަށް ގޮވާލައި މީގެ ކުރިން މުޒާހަރާވެސް ކޮށްފަ އެވެ. އެފްލެޓުތައް އެތަންތަނުގެ ވެރިންނަށް ހަވާލުކުރީ ފިނިޝިންގް މަސައްކަތް ނުނިންމަ އެވެ. އެމީހުންނަކީ ބޮޑު އާމްދަނީ ލިބޭ ފަރާތްތަކަށް ނުވާތީ ފްލެޓުތަކަށް ބޮޑު ހަރަދު ކޮށް އެއްފަހަރާ މުޅި ތަން ނިންމަން ދަތިވެފައިވާކަމަށް ހިޔާ ޔޫނިއަނުންވެސް މީގެ ކުރިން ވަނީ ބުނެފަ އެވެ. ހިޔާ ފްލެޓުތަކުގެ ކުއްޔަކީ 8500 ރުފިޔާ އެވެ. މިއަދަދު ކުޑަކޮށް ކުރީގެ ރައީސް އަބްދުﷲ ޔާމީންގެ ސަރުކާރުން ކަނޑައެޅި 5600 ރުފިޔާއަށް ތިރިކުރަންވެސް ހިޔާ ފްލެޓުތަކުގެ ވެރިން ދަނީ ގޮވައިލަމުންނެވެ. އެހެންނަމަވެސް ސަރުކާރުން ބުނަނީ ފްލެޓުތައް މިހާރު ކުއްޔަށް ދީފައިވަނީ ދެވޭނެ އެންމެ ކުޑަ އަގުގައި ކަމަށެވެ.
