އިޒްރާއީލު ސިފައިން އިއްޔެ ގާޒާގައި ހިންގި ހަމަނުޖެހުންތަކުފައި ފަަލަސްތީނުގެ 47 މުސްލިމަކަށް އެކި ވަރުގެ އަނިޔާތައް ލިބިއްޖެ އެވެ.
މިދިޔަ އަންގާރަ ދުވަހު އިޒްރާއީލު ސަރުކާރުން ރުހުން ދީގެން ޔަހޫދީން ވަނީ އަގްސާ މިސްކިތް ހުންނަ ސަރަހައްދުގައި އެއްވުމެއް ބާއްވައިފަ އެވެ. އެ އެއްވުމުގައި މުސްލިމުން ގާޒާއިން ފޭބުމަށް ގޮވާލާފައި ވެއެވެ. އަދި އިސްލާމް ދީނަށާއި ކީރިތި ރަސޫލާއަށް ވަނީ ފުރައްސާރަކޮށްފަ އވެެ.
ގާޒާގެ އިރުމަތީ ޖެރޫސެލަމްގައި ހުންނަ އަގްސާ މިސްކިތުގައި އިއްޔެ ހުކުރު ނަމާދަށްފަހު މުސްލިމުން ވަނީ ޔަހޫދީން ކީރިތި ރަސޫލާއަށް ފުރައްސާރަ ކުރުމުން އެކަމާއި ދެކޮޅަށް އަޑު އުފުލައިފަ އެވެ. އިއްޔެގެ ސުލްހަވެރި އެއްވުން އަގްސާ މިސްކިތުން ފަށައިގެން ކުރިއަށް ގެންގޮސް ދަަމަސްކަސް ގޭޓާއި ހަމައިން އިޒްރާއީލުގެ ސިފައިން ވަނީ އެއްވުމަށް ހުރަސް އަޅައިފަ އެވެ.
އެގޮތުން ޕެޕާ ސްޕްރޭ ބޭނުންކުރުމުގެ ސަބަބުން 47 މުސްލިމަކަށް އަނިޔާވެފައިވާއިރު ރަބަރު އުންޑަ އަރައިގެން ނުވަ މީހަކަށް ވަނީ ސީރިއަސް ޒަހަމުތަކެއް ލިބިފައެވެ. އޭގެ ތެރެއިން ތިން މީހަކަށް ހޮސްޕިޓަލުގައި ފަރުވާ ދޭން ޖެހުނު ކަމަށް ރެޑް ކްރެސެންޓުން ވަނީ ބުނެފަ އެވެ.
މީގެ އިތުރުން ހަމަނުޖެހުންތަކުގައި އިޒްރާއީލު ސިފައިން ވަނީ ނޫސްވެރިއަކަށްވެސް ހަމަލާ ދީފަ އެވެ. އޭނާއަށް ހޮސްޕިޓަލުގައި ފަރުވާ ދިންނަމަވެސް ލިބުނީ ކިހާވަރެއްގެ ގެއްލުމެއްކަމެއް ސާފެއް ނުވެ އެވެ.
މިދިޔަ ރަމަޟާން މަހު ގާޒާއަށް ބޮން އަޅަން ފަށައި 11 ދުވަހަށް ދިގުދެމިގެންދިޔަ ހަމަލާތައް އިޒްރާއީލުން ހުއްޓައިލީ މިދިޔަ މެއި މަހުގެ ތެރޭގަ އެވެ. އޭގެ ފަހުން މިދިޔަ ބުރާސްފަތި ދުވަހު އަނެއްކާވެސް ބޮމުގެ ހަމަލާއެއް ގާޒާއަށް ވަނީ ދީފަ އެވެ.
އިޒްރާއީލުގެ އާ ބޮޑުވަޒީރު ނަފްތާލީ ބެނެޓް މަގާމާއި ހަވާލުވެވަޑައިގެންނެވުމަށްފަހު ވިދާޅުވެފައިވަނީ ގާޒާ ހިސޯރު ކުރުމުގެ މަސައްކަތް ހުއްޓައި ނުލައި ކުރިއަށް ގެންދާނެ ކަމަށެވެ.
