ފުއްޕާމޭގައި އިންފެކްޝަން އުފެދުމާއި ގުޅިގެން ފަރުވާ ހޯއްދެވުމަށް ސައުދީ ޢަރަބިއްޔާގެ ރަސްގެފާން ސަލްމާން ބިން ޢަބްދުލް އަޒީޒަށް ޖެހިވަޑައިގެންފިއެވެ.
ސައުދީގެ މީޑިއާއިން ބުނެފައިވަނީ ރަސްގެފާނު ސަލްމާނަށް ފުއްޕާމޭގެ އިންފެކްޝަނަށް ފަރުވާ ހޯއްދަވަން ޖެހޭކަން އެނގިވަޑައިގެންނެވީ ގަދައަށް ހުން އައިސް ހުޅުތަކުގައި ރިއްސަން ފެށުމުން ޞިއްޙީ ޙާލަތު ދެނެގަތުމަށް ތަހްލީލުތަކެއް ހެއްދެވުމުންނެވެ.
އުމުރުފުޅުން 88 އަހަރުފުޅުގެ ރަސްގެފާނު ސަލްމާނުގެ ސިއްހީ ހާލަތުގެ ސަބަބުން އެ ޤައުމުގެ ވަލީއަހުދު މުޙައްމަދު ބިން ސަލްމާން ވަނީ ޖަޕާނަށް ކުރައްވަން އޮތް ހަތަރު ދުވަހުގެ ރަސްމީ ދަތުރެއް ވެސް ފަސް ކުރައްވާފަ އެވެ.
ސަލްމާން ރަސްގެފާން 2015 ވަނަ އަހަރު ތަޚުތަށް އިސްވެވަޑައިގެންނެވީ ކުރީގެ ރަސްގެފާން އަބްދުﷲ، 90، އަވަހާރަވުމާ ގުޅިގެންނެވެ. އަދި ޖޫން 2017 ގައި ރަސްގެފާން ސަލްމާން ވަނީ ދަރިކަލުން މުހައްމަދު ބިން ސަލްމާން، ވަލީ އަހުދުގެ މަގާމަށް ހަމަޖައްސަވައިފަ އެވެ.
