އިޒްރާއީލު ސިފައިން ފަލަސްތީނުގެ ވެސްޓު ބޭންކުގެ ނަބްލުސް ސިޓީގައި ދިން ބަޑީގެ ހަމަލާތަކެއްގައި 20 އަހަރުގެ ޒުވާނަކު މަރާލައިފި އެވެ.
ފަލަސްތީނުގެ ނޫސް އެޖެންސީ ވަފާއިން ބުނި ގޮތުގައި މަރާލާފައި ވަނީ މުހައްމަދު ފަރީދު ހަސަން ނަމަކަށް ކިޔާ ޒުވާނެކެވެ. އޭނާ މަރައިލީ ގުސްރާގައި އޭނާ ދިރިއުޅޭ ގޭގެ ފުރާޅުގައި ހުއްޓަ އެވެ. ބަޑި ޖަހާފައިވަނީ ފަރީދުގެ މެއަށް ކަމަށްވެސް ވަފާއިން ރިޕޯޓުކޮށްފައި ވެއެވެ.
ނަބްލުސްގެ ގުސްރާ ސަރަަހައްދު ހިސޯރުކޮށްގެން އިޒްރާއީލުގެ ޔަހޫދީން އަންނަނީ ދިރިއުޅެމުންނެވެ. އެތަނުގައި ދިރިއުޅޭ މުސްލިމުންނަށް މީގެ ކުރިންވެސް އެކި ކަހަލަ އުނދަގޫތަކާއި ވަނީ ކުރިމަތިލާން ޖެހިފަ އެވެ.
އިއްޔެ ދިން ބަޑީގެ ހަމަލާތަކުގައި ފަލަސްތީނުގެ އިތުރު ދެ މީހަކަށްވެސް ވަނީ އަނިޔާ ލިބިފަ އެވެ. އެގޮތުން ވަޒަން އަރައި އެ ދެމީހުން ވަރަށް ބޮޑަށް ޒަހަމުވެފައިވާކަމަށް ރިޕީޓުތައް ބުނެ އެވެ.
އިޒްރާއީލު ސިފައިން އިއްޔެ ވަނީ ގާޒާގެ ހަމާސް ޖަމާއަތުން ރޮކެޓް ލޯންޗު ކޮށް ހަތިޔާރު އުފައްދާކަމަށް ތުހުމަތު ކުރެވޭ ސައިޓަކަށް ވައިގެ މަގުން ހަމަލާ ދީފަ އެވެ. މި ވައިގެ ހަމަލާތަކުގައިވެސް މީހަކަށް ޒަހަމްތަކެއް ލިބުނުކަމަށް ބައެއް ރިޕޯޓުތައް ބުނި ނަމަވެސް އެކަން މުޅިން ކަށަވަރެއް ނުވެ އެވެ.
މިދިޔަ ރަމަޟާން މަހު އިޒްރާއީލުން ފަލަސްތީނަށް ދިން ހަމަލާތައް ހުއްޓައިލިފަހުން ދިން މިއީ ހަތަރުވަނަ ހަމަލާ އެވެ. މިދިޔަ މެއި މަހުގެ ތެރޭގައި ފަށައި 11 ދުވަހަށް ދިގު ދެމިގެންދިޔަ ހަމަލާތަކުގައި ފަލަސްތީނުގެ 66 ކުޑަކުދިން ހިމެނޭހެން 257 މީހަކު ވަނީ މަރުވެފަ އެވެ.
ގާޒާ ހިސޯރު ކުރުމުގެ ގޮތުން އިޒްރާއީލުން ދެމުންދާ ހަމަލާތައް ބައިނަލްއަގުވާމީ ޖަމިއްޔާ ޖަމާއަތްތަކުން ދަނީ ކުށްވެރި ކުރަމުންނެވެ. އެގޮތުން އދ. ގެ އިންސާނީ ހައްގުތަަކަށް މަސައްކަތްކުރާ ފަރާތްތަކުން ވިދާޅުވާ ގޮތުގައި އިޒްރާއީލުން ވެސްޓް ބޭންކުގައި މިހާރު ހިންގަމުންދާ ޖަރީމާ ތަކަކީ ލާއިންސާނީ ހަމަލާތަކެކެވެ. އަދި މިކަމުގެ ސަބަބުން އަމާންކަން ގެއްލިގެން ދާކަންވެސް އެޖަމިއްޔާއިން ފާހަގަކުރެ އެވެ.
