މުސްލިމުންގެ ރަމަޟާން މަހާއި ދިމާކޮށް މިއަހަރުގެ މެއި މަހުގެ ތެރޭގައި އިސްރާއީލުން ފަލަސްތީނުގެ ގާޒާއަށް ދިން ހަމަލާތަކުގައި އާންމުންގެ އެތައް ބަޔަކު މަރައިލިއިރު އެއީ ހަނގުރާމައިގެ ކުށެއްކަމަށް އިންސާނީ ހައްގުތަކަށް މަސައްކަތް ކުރާ އެމެރިކާގެ އެންޖީއޯ، ހިއުމަން ރައިޓްސް ވޮޗުން ކަނޑައަޅައިފި އެވެ.
ހިއުމަން ރައިޓްސް ވޮޗުން ވަނީ އިޒްރާއީލާއި ގާޒާއާއި ދެމެދު ހިނގައިދިޔަ ހަމަނުޖެހުންތަކާއި ގުޅިގެން ތަހުގީގެއް ކުރިއަށް ގެންގޮސްފަ އެވެ. އެ ތަހުގީގުގައި ވަނީ އިޒްރާއީލުން ދިން ތިން ވައިގެ ހަމަލާއެއްގައި ގާޒާގެ 62 އާންމު ރައްޔިތުން މަރުވެފައިވާކަން ފާހަގަކޮށްފަ އެވެ. އަދި އެ ތިން ހަމަލާ އަމާޒުކުރި ސަރަހައްދުގައި ހަނގުރާމަ މަތީ ޖަމާއަތަކަށް ނިސްބަތްވާ އެއްވެސް މަރުކަޒެއް ނުވަތަ ހަބެއް ނެތްކަންވެސް ތަހުގީގުގައި ވަނީ ފާހަގަކޮށްފަ އެވެ.
އިޒްރާއީލު ސިފައިން ބުނެފައިވަނީ އެމީހުން ވައިގެ ހަމަލާތައް އަމާޒު ކުރީ ގާޒާގެ ހަނގުރާމަ މަތީ ސެންޓަރުތަކާއި އެފަދަ މީހުން ތިބި ތަންތަނަށް އެކަނި ކަމަށެވެ.
ހިއުމަން ރައިޓްސް ވޮޗުގެ ރިޕޯޓުގައި އިތުރަށް ބުނެފައިވަނީ އިޒްރާއީލުން ދޫކުރި 4،300 ރޮކެޓުގައި ގާޒާގެ އާންމުންނަށް ގެއްލުން ވެފައިވާކަމަށެވެ. 11 ދުވަހަށް ދިގު ދެމިގެންދިޔަ އެ ހަމަލާތަކުގައި ގާޒާގެ 260 މީހުން މަރުވިކަމަށް ލަފާކުރެވެ އެވެ. އިޒްރާއީލުން މަރުވީ 13 މީހުންނެވެ.
އދ އިން ބުނެފައިވަނީ ގާޒާއިން މަރުވި މީހުންގެ ތެރެއިން 129 މީހުންނަކީ އާންމު ރައްޔިތުން ކަމަށެވެ. އެހެންނަމަވެސް އިޒްރާއީލުން ބުނަނީ މަރުވި މީހުންގެ ތެރެއިން 200 މީހުންނަކީ ހަނގާމަމަތީ ސިފައިން ކަމަށެވެ. އެހެންނަމަވެސް ގާޒާއަށް ނިސްބަތްވާ ހަނގުރާމަމަތީ ޖަމާއަތެއްކަމަށްވާ ހަމާސްއިން ބުނީ މަރުވީ އެ ޖަމާއަތުގެ 80 މީހުން ކަމަށެވެ.
ހިއުމަން ރައިޓްސް ވޮޗުން ވަނީ ތިން ހަަމަލާއެއް މައިގަނޑު ގޮތެއްގައި ފާހަގަކޮށްފަ އެވެ. އެގޮތުން މެއި މަހުގެ 0 ވަނަ ދުވަހު ދިން މިސައިލު ހަމަލާގައި އާންމުންގެ 8 މީހަކު މަރުވެ 4 ގެއެއް ވަނީ ބިމާ ހަަމވެފަ އެވެ. އިޒްރާއީލުން ބުނީ މިސައިލު ގޮވީ ގާޒާއިން ދޫކުރި ރޮކެޓެއްގެ ސަބަބުން ކަމަށެވެ.
މެއި 15 ވަނަ ދުވަހު އިޒްރާއީލުން ދިން ބޮމުގެ ހަމަލާއެއްގައި ތިން ބުރީގެ އިމާރާތެއް ގޮއްވާލައި އާންމުންގެ 10 މީހަކު މަރުވިކަމަށްވެސް ހިއުމަން ރައިޓްސް ވޮޗުން ވަނީ ބުނެފަ އެވެ. މިކަމަށް އިންކާރުކޮށް އިޒްރާއީލު ސިފައިން ބުނީ އެ އިމާރާތުގެ ތެރޭގައި ތިބީ ހަަމާސް ޖަމާއަތަށް ނިސްބަތްވާ އިސް މީހުންތަކެއް ކަަމަށެވެ. އެހެންނަމަވެސް ހިއުމަން ރައިޓްސް ވޮޗްއަށް މައުލޫމާތު ދިން މީހުން އިޒްރާއީލު ސިފައިންގެ އެ ވާހަކަ ދޮގު ކުރެ އެވެ.
ޔިންވަނަ ހަމަލާއަކީ މެއި 16 ވަނަ ދުވަހު ދިން ހަމަލާ އެވެ. އެއީ ގާޒާގެ އަލް ވަހްދާ މަގަށް ދިން ހަމަލާއެއްގައި ތިން ބުރީގެ އިމާރާތެއް ބިމާ ހަމަކޮށްލައި ގާޒާގެ 44 އާންމު ރައްޔިތުން މަރައިލި ހަމަލާއެކެވެ. އިޒްރާއީލު ސިފައިން ބުނެފައިވަނީ އެހަމަލާ އަމާޒު ކުރީ ހަމާސްގެ ސިއްރު ހޮހޮޅަތަކެއް ގޮއްވައިލަން ކަމަށެވެ. އެހެންނަމަވެސް ތިން ބުރީގެ އިމާރާތް ގޮވީ ގަސްތުގައި ކުރި ކަމަކުން ނޫން ކަަމަށް އިޒްރާއީލުން ބުނެ އެވެ.
ހިއުމަން ރައިޓްސް ވޮޗުން ބުނެފައިވަނީ ހަމާސް ޖަމާއަތުން އިޒްރާއީލަށް ދިން ހަމަލާތަކެއްގައިވެސް އިންސާނީ ހައްގުތަކަށް އަރައިގެންފައިވާކަން ފާހަގަކުރެވޭ ކަމަށެވެ. އެކަމާއި ގުޅޭ ވަކި ރިޕޯޓެއް އަންނަ މަހު އާންމު ކުރާނެ ކަމަށް ބުންޏެވެ.
