ކޮވިޑް19 ބަލިމަޑުކަމުގައި އަނެއްކާވެސް ސްރީލަންކާގެ ހާލަތު ގޯހުން ގޯހަށް ގޮސް ހަރުކަށި ފިޔަވަޅުތަކެއް އަޅަން ނިންމައިފިއެވެ.
ކަމާބެހޭ ފަރާތްތަކުން މިގޮތަށް ނިންމާފައިވަނީ ހޮސްޕިޓަލްތަކުގައި އެނދުމަތި ކޮށްފައިވާ މީހުންނަށް އެކަށީގެންވާ ފަރުވާ ނުދެވެނީސް އިތުރު މީހުން ހޮސްޕިޓަލްތަކަށް ގެންނަމުން ދިއުމާ ގުޅިގެންނެވެ. އެގޮތުން ސްރީލަންކާގެ ސަރުކާރުން ވަނީ އަންނަ މަހުގެ އެއްވަނަ ދުވަހާއި ހަމައަށް އާއްމުން ގިނައިން އެއްވެ ކަންކަން ނުކުރުމަށާއި ސަރުކާރުގެ ފަރާތުން އިންތިޒާމު ކުރާ ހަފްލާތައްވެސް ބޭއްވުން މަނާ ކޮށްފައެވެ.
އޮފީސްތަކުގައި މަސައްކަތް ކުރާ މީހުންވެސް އަނެއްކާވެސް ގޭގައި ތިބެގެން މަސައްކަތް ކުރުމަށް ސަރުކާރުން ވަނީ ނިންމާފައެވެ. ޖަނާޒާގައި ބައިވެރިވެވޭ އަދަދު ފަންސާހަށް ތިރިކޮށް ކައިވެނި ހަފްލާތަކުގައި ބައިވެރިވެވޭ އަދަދު ވެސް ވަނީ 150 އަށް މަދުކޮށްފައެވެ. ވެކްސިން ދޭން ފެށުމާއެކު ސްރީލަންކާގައި ލުއިތައް ދީފައިވަނީ މިދިޔަ ޖުލައި މަހުއެވެ.
