ކޮވިޑް19 ދިފާއު ވެކްސިން ޖަހައިގެން ގޭގައި ތިބުމަށް ސްރީލަންކާ ސަރުކާރުން އިލްތިމާސްކޮށްފިއެވެ.
ހަލުވިކަމާއެކު ސްރީލަންކާގައި ފެތުރެމުންދާ ޑެލްޓާރ ސްޓްރެއިންގެ ސަބަބުން ހޮސްޕިޓަލްތަކުގައި އެޑްމިޓް ކުރާ މީހުން އިތުރުވެ ގޮތް ނޭނގި މަރުވާ މީހުންވެސް އިތުރުވެފައިވާ ކަމަށް ސްރީލަންކާގެ ނޫސްތަކުން ދަނީ ރިޕޯޓްކުރަމުންނެވެ. އެހެންކަމުން އެގައުމުގެ ސަރުކާރުން ބުނެފައިބަނީ ދުނިޔޭގެ ގިނަ ގައުމުތަކެއްގައި ވެކްސިން ޖެހުމުގެ ސަބަބުން ކޮވިޑް 19ގެ ބަލިމަޑުކަމުން ގިނަ ބަޔަކު ސަލާމަތްވެފައިވާތީ ވީހާވެސް އަވަހަކަށް ވެކްސިން ޖެހުމަށް ރައްޔިތުންނަށް އިލްތިމާސްކުރާ ކަމަށެވެ.
އަދި ކޮންމެހެން ބޭނުންވެގެން ނޫނީ ގެއިން ބޭރަށް ނުނިކުތުމަށާއި ކައިވެނި ހަފްލާތަކާއި ޖަނާޒާތަކުގައި ބައިވެރިނުވުމަށް ވަނީ އިލްތިމާސް ކޮށްފައެވެ. މީގެ އިތުރުންވެސް ކޮވިޑް19ގެ ބަލިމަޑުކަމުގެ އެއްވެސް އަލާމާތެއް ހުރިނަމަ ގެއިން ނުނިކުތުމަށާއި ވީހާވެސް އަވަހަކަށް ސިއްހީ އެހީތެރިކަން ހޯދުމަށް ވަނީ އިލްތިމާސް ކޮށްފައެވެ. ބަންދުކޮށްފައި ތިބޭ ތަންތަނުގައި ގިނައިރު ވަންދެން ނުތިބުމަށްވެސް ވަނީ އިލްތިމާސްކޮށްފައެވެ.
