ކޮވިޑްގެ ތިންވަނަ ރާޅާއެކު ސްރީލަންކާ އަނެއްކާވެސް ފުރަބަންދު ކުރަން ނިންމައިފިއެވެ.
ސްރީލަންކާ ފުރަބަންދު ކުރަން ސަރުކާރުގެ ކަމާބެހޭ ފަރާތްތަކުން ނިންމާފައިވަނީ ކޮވިޑްގެ ޑެލްޓާ ވޭރިއެންޓް ފެތުރި މިހާރަކަށް އައިސް އެގައުމުން ގިނަ ބަޔަކު ކޮވިޑަށް ޕޮޒިޓިވްވަމުންދާތީއެވެ. ތަފާސް ހިސާބުތަކުން ދައްކާގޮތުގައި މިހާރު އެގައުމުން ދުވާލެއްގެ މައްޗަށް ކޮވިޑަށް ޕޮޒިޓިވްވާ މީހުންގެ އަދަދު ވަނީ 3000 މައްޗަށް އަރާފައެވެ. އަދި ކޮވިޑް ބަލި ޖެހިގެން ފަރުވާ ނުދެވުމުގެ ސަބަބުންނާއި ހާލު ބޮޑުވެގެން އެގައުމުން ދުވާލެއްގެ މައްޗަށް މަރުވާ މީހުންގެ އަދަދު ވަނީ 100 މައްޗަށް އަރާފައި ކަމަށް ތަފާސް ހިސާބުތަކުން ދައްކައެވެ.
އެގައުމުގެ ސިއްހަތާއި ބެހޭ ވަޒީރު ކެހެލިޔާ ރަމްބުވެއްލާ ކުރެއްވި ޓުވީޓެއްގައި ވިދާޅުވީ، އަދި ސްރީލަންކާ ފުރަބަންދު ކުރަން ނިންމާފައިވަނީ 10 ދުވަހުގެ މުއްދަތަކަށް ކަމަށެވެ. ފުރަބަންދު ކުރަން ނިންމާ އެގައުމުގެ ސަރުކާރުން އާއްމުކޮށްފައިވާ އުސޫލަށް އަމަލު ކުރަން ނިންމާފައިވަނީ މިރޭ 22:00 ފެށިގެންނެވެ.
ފުރަބަންދު ކުރަން ނިންމުމުގެ ކުރިން ރައްކާތެރިކަމުގެ ގޮތުން ސަރުކާރުން ވަނީ ގިނަ ފިޔަވަޅުތަކެއް އަޅާފައެވެ. އެގޮތުން ގިނަ މީހުން އެއްވެ ޕާޓީތަކާއި ޖަނާޒާތައް ނުބޭއްވުމަށް ވަނީ އިލްތިމާސް ކޮށްފައެވެ.
