މެލޭޝިއާގެ ބޮޑުވަޒީރުކަމުގެ ހުވާ އިސްމާއީލް ސަބްރީ ކުރައްވައިފިއެވެ.
މުޅި ދުނިޔޭގައިވެސް ކޮވިޑްގެ ހާލަތު ގޯސްވެފައިވާ ދަނޑިވަޅެއްގައި ސަބްރީ ހުވާ ކުރެއްވި އިރު މެލޭޝިއާގައިވެސް ވަނީ ކޮވިޑް19ގެ ހާލަތު ވަރަށް ބޮޑަށް ގޯސްވެފައެވެ. އެހެންކަމުން ސަބްރީއަށް އެންމެ ބޮޑު ގޮންޖެހުމަކަށްވާނީ މި ހަލަތާއި އެކު އެގައުމުގެ ކަންކަން ކުރިއަށް ގެންދިއުމަށް ކަމަށް ބެލެވެއެވެ.
މިދަނޑިވަޅަކީ މެލޭޝިޔާގެ ސިޔާސީ ހާލަތުވެސް މާރަނގަޅު ދުވަސްވަރަކަށް ނުވާއިރު ސިޔާސީ ހާލަތު ހަމައަކަށް އެޅުވުމަކީވެސް ސަބްރީއަށް ދިމާވާނެ އެންމެ ބޮޑު އެއް ގޮންޖެހުމެވެ. މެލޭޝިޔާގެ ޤާނޫނުހަދާ މަޖިލީހުގެ އަގުލަބިއްޔަތު ގެއްލި ބޮޑުވަޒީރުގެ މަގާމުން މުހިއްޔިއްދީން އިސްތިއުފާ ދީފައިވަނީ ހިޔާނާތުގެ މައްސަލަތައް ތަހްގީގުކުރަން ފެށުމުންނެވެ.
މެލޭޝިޔާގެ އެންމެ ބޮޑު ޕާޓީކަމަށްވާ ޔުނައިޓަޑު މެލޭސް ނޭޝަނަލް އޯގަނައިޒޭޝަން، ޔޫއެމުއެންއޯގެ އިސް މެންބަރުންނާ ދެކޮޅަށްވަނީ ހިޔާނާތުގެ ދަޢުވާކޮށްފައެވެ. އޭގެ ތެރޭގައި މެލޭޝިޔާގެ ކުރީގެ ބޮޑުވަޒީރު ނަޖީބް ރައްޒާގްވެސް ހިމެނިވަޑައިގަންނަވައެވެ.
