އަލަށް ފެނިގެން އުޅޭ ކޮވިޑްގެ ވޭރިއަންޓް "އޮމިކްރޮން" އަކީ ހުރިހާ ގޮތަކުންވެސް ނުރައްކާ ބޮޑު ވޭރިއަންޓެއްކަމަށް ޑަބްލިއުއެޗްއޯއިން ކަނޑައަޅައިފިއެވެ.
ދުނިޔޭގެ ސިއްހަތު ޖަމިއްޔާއިން ބުނެފައިވަނީ އޮމިކްރޮން ވޭރިއަންޓަކީ ކޮވިޑް-19 ކުރިން ޖެހިފައި ތިބި މީހުންނަށް ވެސް ޖެހޭ ވޭރިއަންޓެއް ކަން ވަނީ ކަށަވަރު ކުރެވިފައި ކަމަށެވެ. އޮމިކްރޮން އަށް ޕޮސިޓިވްވާ މީހުންގެ އަދަދު ދެކުނު އެފްރިކާގެ ހުރިހާ ޕްރޮވިންސަކުން ވެސް އަންނަނީ އިތުރުވަމުން ކަމަށާއި މި ވޭރިއަންޓް އެންމެ ފުރަތަމަ ފެނިފައިވަނީ މިމަހުގެ ނުވަ ވަނަ ދުވަހު ކަމަށް ޑަބްލިއުއެޗްއޯއިން ހާމަކުރެއެވެ.
މި ވޭރިއަންޓާ ގުޅިގެން މާގިނަ އިތުރު ތަފްސީލްތަކެއް އަދި އެ ޖަމިއްޔާއިން ހާމަކޮށްފައި ނުވާއިރު ކޮވިޑް19 އިން މިހާރުވެސް ރައްކާތެރިވުމަށް އަޅަމުންދާ ފިޔަވަޅުތައް ދެމެހެއްޓުމާއެކު ވެކްސިންދިނުން ވީހާވެސް ގިނަ ކުރުމަށް ވަނީ ލަފާ ދީފައެވެ.
ކޮވިޑްގެ މި ވޭރިއަންޓާ ގުޅިގެން އެމެރިކާއިން ވަނީ އެގައުމަށް އަށް ގައުމަކުން މީޙުން އެތެރެވުންވެސް މަނާ ކޮށްފައެވެ. އެގޮތުން މި އަށް ގައުމުގެ ތެރޭގައި ހިމެނެނީ ދެކުނު އެފްރިކާ، ބޮޓްސްވާނާ، ޒިމްބާބުއޭ، ނެމީބިއާ، ލެސޯތޯ، އެސްވަޓިނީ، މޮޒަމްބީގް އަދި މަލާވީގެ މީހުން އެމެރިކާ އަށް އެތެރެވުން މަނާ ކަމަށެވެ.
