ދެކުނު އެފްރިކާއިން ދެ ފްލައިޓެއްގައި އެމްސްޓަރޑަމް އަށް ދިޔަ ގިނަ ބަޔަކު ކޮވިޑަށް ޕޮޒިޓިވްވެއްޖެއެވެ.
ބޭރުގެ މީޑިއާތަކުން ރިޕޯޓްކޮށްފައިވާ ގޮތުގައި ކޮވިޑް 19 އަށް ޕޮޒިޓިވްވި 61 މީހުން ވަނީ ޝިޕޯލް އެއަރޕޯޓާ ކައިރި ހޮޓަލެއްގައި އައިސޮލޭޓްކޮށްފައެވެ. އަދި ނެދަރލޭންޑްސްގެ ކަމާބެހޭ ފަރާތްތަކުން މިވަގުތު ދަނީ ކޮވިޑަށް ޕޮޒިޓިވްވި މީހުންގެ ތެރޭގައި އޮމިކްރޮން ވައިރަސްގެ ބަލި މީހަކު ހުރިތޯ ބަލަމުން ކަމަށްވެސް ރިޕޯޓްތައް ބުނެއެވެ.
ސައުތު އެފްރިކާއިން ފެނިފައިވާ ކޮވިޑްގެ އައު ވޭރިއަންޓްގެ ފުރަތަމަ ކޭސް ފެނިފައިވަނީ މިމަހުގެ 24 ވަނަ ދުވަހު ކަމަށް ޑަބްލިއުއެޗްއޯއިން ވަނީ ހާމަކޮށްފައެވެ. މި ކަމާގުޅިގެން ދުނިޔޭގެ ގިނަ ގައުމުތަކަކުން ދަނީ ސައުތު އެފްރިކާގެ ގައުމުތަކުގެ ފަތުރުވެރިން އެގައުމުތަކަށް ދަތުރު ކުރުންވެސް މަނާ ކުރަމުންނެވެ.
ޕޮޒިޓިވްވެފައިވާ މީހުން އަލާމާތްތައް ހުރިނަމަ ހަތް ދުވަސް ވަންދެން ހޮޓެލްއެއްގައި ކަރަންޓީނު ކުރުމަށްފަހު، އަދި ޕޮޒިޓިވްވެފައިވާ ނަމަވެސް އަލާމާތްތެއް ނެތްނަމަ ފަސް ދުވަސް ކަރަންޓީނުވާންޖެހޭ ގޮތަށް ނެދަރލޭންޑްސްގެ ކަމާބެހޭ ފަރާތްތަކުން ވަނީ ނިންމާފައެވެ.
