މިމަހުގެ 18 ވަނަ ދުވަހު އެކަނިވެސް 6،955 ފަތުރުވެރިން ރާއްޖެ އައިސްފައިވާ ކަމަށް ޓޫރިޒަމް މިނިސްޓްރީން ބުނެފިއެވެ.
ޓުއަރިޒަމް މިނިސްޓްރީން ބުނީ ކޮވިޑް19 ގެ ބަލިމަޑު ކަމާއި ގުޅިގެން ރާއްޖޭގެ ބޯޑަރު ބަންދުކޮށްފައި އޮތުމަށްފަހު ބޯޑަރު ހުޅުވާލިފަހުން މިހާތަނަށް އެއް ދުވަހަކާއި ރާއްޖެއަށް އެންމެ ގިނަ ފަތުރުވެރިން އައީ އިއްޔެ ކަމަށެވެ. އެ މިނިސްޓްރީގެ ތަފާސް ހިސާބުތަކުން ދައްކާގޮތުން މި ހިނގާ ޑިސެމްބަރު މަހުގެ 15 ވަނަ ދުވަހާއި ހަމައަށް ވަނީ ރާއްޖޭގެ ޓޫރިސްޓު ބެޑްނައިޓްސް 10.7 މިލިއަން ހުރަސްކޮށްފައެވެ.
އެހެންކަމުން މި އަދަދާއެކު ސަރުކާރުން 2021 ވަނަ އަހަރަށް ކަނޑައެޅި 10 މިލިއަން ބެޑް ނައިޓްސްގެ އަމާޒު ހާސިލްވިއިރު ޓުއަރިޒަމް މިނިސްޓްރީން ލަފާކުރާ ގޮތުން މި އަހަރު ނިމިގެން ދާއިރު 11 މިލިއަން ބެޑްނައިސްޓް ހުރަސް ކުރާނެ އެވެ.
ޓުއަރިޒަމްގެ ތަފާސް ހިސާބުތަކުން އެނގެން އޮތްގޮތުން މި ޑިސެމްބަރު މަހުގެ ކޮންމެ ދުވަހަކުވެސް ރާއްޖެއަށް ފަސްހާހަށްވުރެ ގިނަ ފަތުރުވެރިން ދަނީ އަންނަމުންނެވެ. މިހާރު ރާއްޖެއަށް އެންމެ ގިނަ ފަތުރުވެރިން އަންނަމުންދަނީ އަވަށްޓެރި އިންޑިޔާއިން ނެވެ. މިހާތަނަށް އިންޑިއާއިން ވަނީ ރާއްޖެއަށް 278،740 ފަތުރުވެރިން އައިސްފައެވެ. އަދި ރަޝިއާއިން ރާއްޖެއައި ފަތުރުވެރިންގެ އަދަދު ވަނީ 211،367 އަށް އަރާފައެވެ.
މިއަހަރުގެ މިހާތަނަށް ރާއްޖެއައި ފަތުރުވެރިންގެ ޖުމުލަ އަދަދަކީ 1,232,151 އެވެ.
