ކޮވިޑް19 ޖެހިގެން މުޅި ދުނިޔެއިން މަރުވި މީހުންގެ އަދަދު 4 މިލިއަނުން މައްޗަށް އަރައިފިއެވެ.
ތަފާސް ހިސާބުތައް ދައްކާގޮތުން މިބަލީގައި ވަނީ މިހާތަނަށް 4،344،715 (ހަތަރު މިލިއަން ތިންސަތޭކަ ސާޅީސް ހަތަރުހާސް ހަތްސަތޭކަ ފަނަރަ) މީހުން މަރުވެފައެވެ. މިހާތަނަށް މުޅި ދުނިޔެއިން މިބަލި ޖެހުނު ކަމަށް ތަފާސް ހިސާބުތަކުން ދައްކަނީ 206،166،805 (ދުއިސައްތަ ހަ މިލިއަން އެއް ސަތޭކަ ފަސްދޮޅަސް ހަހާސް އަށްސަތޭކަ ފަސް) މީހުންނަށެވެ.
އަވަށްޓެރި އިންޑިއާއަށް ބަލައިފިނަމަ އެގައުމުން އެކަނިވެސް ވަނީ ކޮވިޑްގައި 430،254 (ހަތަރު ލައްކަ ތިރީސް ހާސް ދުއިސައްތަ ފަންސާސް ހަތަރު) މީހުން މަރުވެފައެވެ. މިހާތަނަށް އެގައުމުން ބަލި ޖެހުނު ކަމަށް ރެކޯޑްކުރެވިފައިވާ އަދަދަކީ 32،117،826 (ބައްތިރީސް މިލިއަން އެއްސަތޭކަ ސަތާރަހާސް އަށްސަތޭކަ ސައްބީސް މީހުންނެވެ.
ކޮވިޑަށް ޕޮޒިޓިވް އެންމެ ގިނަ މީހުން ފެނިފައިވާ އިންޑިއާގެ އަވަށަކީ މަހާސްރާތްރާ ކަމަށް ތަފާސް ހިސާބުތަކުން ދައްކާއިރު އެ އަވަށުން އެކަނިވެސް ވަނީ ހަ މިލިއަން ތިންސަތޭކަ ހަތްދިހަ ފަސްހާސް ތިންސަތޭކަ ނުވަދިހަ މީހުން ޕޮޒިޓިވްވެފައެވެ. އެއަވަށުން އެކަނިވެސް ކޮވިދް ޖެހިގެން އެއްލައްކަ ތިރީސް ހަތަރުހާސް މީހުން ވަނީ މަރުވެފައެވެ.
ކޮވިޑް19 އެންމެ ފުރަތަމަ ފެނިފައިވަނީ ޗައިނާގެ ވުހާން ސިޓީ އިންނެވެ. މިހާތަނަށް ދުނިޔޭގެ ގިނަ ގައުމުތަކަކުން މި ބަލި ފެނި ގިނަ ބަޔަކު ދުނިޔެ ދޫކޮށްފައިވާއިރު އަދިވެސް ބައެއް ގައުމުތަކުގައި ހަލުވި ކަމާއެކު މިބަލި ދަނީ ފެތުރެމުންނެވެ. ކުޑަ އާބާދީއެއް އޮންނަ ރާއްޖެއިން އެކަނިވެސް މިބަލީގައި 222 މީހުން ވަނީ މަރުވެފައެވެ.
