މިއަދު ހަވީރު 4އިން މިރޭގެ 8އަށް މާލޭގެ މަގުތަކުގައި ދުއްވުން މަނާކޮށް ފައިމަގުގައި އުޅޭގޮތަށް ސިޓީ ކައުންސިލުން ވަނީ ނިންމާފައެވެ.
މީގެ ކުރިންވެސް އެކި މުނާސަބަތުތަކާއި ގުޅިގެން މާލޭގެ މަގުތަކުގައި ވަކި ވަގުތެއް ފައިމަގުގައި އުޅޭގޮތަށް ހަމަޖައްސާ އެކަން އެގޮތަށް ކުރަމުން އާދެއެވެ. ނަމަވެސް ކޮވިޑްގެ ބަލިމަޑުކަން ފެތުރެން ފެށިފަހުން ފައިމަގުގައި އުޅޭވަގުތެއް ކަނޑައެޅި މީ ފުރަތަމަ ފަހަރެވެ.
މާލެ ސިޓީ ކައުންސިލުން ބުނެފައިވަނީ މިގޮތަށް ދުއްވާ އެއްޗެހި ދުއްވުން މަނާކޮށް ފައިމަގުގައި އުޅޭ ވަގުތު ހަމަޖެއްސީ ރައްޔިތުންގެ ހިޔާލު ހޯދުމަށް ހުޅުވާލުމުން ގިނަ ރައްޔިތުންތަކެއް އެކަމަށް އެދުމުން ކަމަށެވެ. ފައިމަގުގައި މަގުތަކުގައި އުޅޭ ވަގުތަކީ އާއިލާތައް އެކުގައި ނިކުމެ އުފާވެރި ވަގުތުކޮޅެއް ހޭދަކޮށްލަން ލިބިގެންދާ ފުރުސަތަކަށެވެ.
ދުއްވުން މަނާވަގުތުގައިވެސް ސަލާމަތީ ހިދުމަތްތަކުގެ އުޅަނދުފަހަރާއި އިމަރޖެންސީ ހާލަތްތަކުގައި ކޮންމެހެން ދުއްވަންޖެހޭ އުޅަނދުތައް ދުއްވުމުގެ ހުއްދަ އޮންނާނެ ކަމަށް ސިޓީ ކައުންސިލުން ވަނީ ހާމަކޮށްފައެވެ.
އަޟްހާ އީދު ބަންދާ ސުކޫލް ބޮޑު ބަންދާއި ދިމާވުމުން ޗުއްޓީއަށް ގިނަ ބަޔަކު ވަނީ އަތޮޅު ތެރެއަށް ފުރައިގެން ގޮސްފައެވެ. ކޮވިޑްގެ ހާލަތާއި ގުޅިގެން އެއް ތަނުން އަނެއް ތަނަށް ދިއުމުގެ ފުރުަތު ބަންވެފައި އޮތުމަށްފަހު ވެކްސިން ޖެހި ފަރާތްތަކަށް ދިން ލުޔާއެކު ގިނަ ބަޔަކު ވަނީ ރާއްޖެ އާއި ރާއްޖެއިން ބޭރަށް ޗުއްޓީ ހޭދުކުރުމަށް ފުރާފައެވެ. ނަމަވެސް ވިސްނާލަން ޖެހޭ ކަމަކީ އަދިވެސް ކޮވިޑްގެ ހާލަތު ރަނގަޅުނުވާތީ ގިނަ މީހުން އެއްތަނަކަށް އެއްވެ އުޅުން ރަނގަޅު ނޫން ކަމަށާއި އީދު ކުޅިވަރުތައްވެސް ނުކުޅުމަށް އެޗްޕީއޭއިންވެސް ވަނީ އިލްތިމާސްކޮށްފައެވެ.
