ގއ. ކޮނޑޭއަށް މީހުން ބަދަލުވިތާ 50 އަހަރު ފުރުން ފާހަގަ ކުރުމަށް ލޯގޯ މުބާރާތެއް ބާއްވަން އެރަށު ކައުންސިލުން ނިންމައިފި އެވެ.
ކޮނޑޭ ކައުންސިލުން ނެރުނު އިއުލާނެއްގައި ބުނެފައިވަނީ ކުރީގެ ރައީސް އިބްރާހިމް ނާސިރުގެ ވެރިކަމުގައި ކުރިއަށް ގެންދިއަ އެއްފަސް ކުރުމުގެ ސިޔާސަތުގެ ދަށުން ކޮނޑޭ ރައްޔިތުން 1970 ވަނަ އަހަރު ގއ.ދާންދޫއަށް ބަދަލު ކުރުމަށްފަހު، އަނބުރާ ކޮނޑޭއަށް ބަދަލުވި ތާރީޚީ މުނާޞަބާއަށް 50 އަހަރު ފުރުން ކުލަގަދަކޮށް ފާހަގަ ކުރުމަށް ގިނަ ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވާ ކަމަށެވެ. އެގޮތުން ކޮނޑޭގެ 50 ވަނަ އަހަރީ ދުވަސް "12 އެޕްރީލް 2025" މި މުނާޞަބަތާއި ގުޅިގެން ކުރިއަށް ގެންދިއުމަށް ރާވާފައިވާ އެކިއެކި ހަރަކާތްތަކުގައި ބޭނުން ކުރުމަށް މުނާޞަތަބާއި ގުޅޭ ލޯގޯ ފަރުމާ ކުރުމަށް މުބާރާތެއް ކުރިއަށް ގެންދިއުމަށް ކައުންސިލާއި، އަހަރީ ކޮމިޓީއިން ނިންމާފައިވާ ކަމަށެވެ.
އެހެންކަމުން ކޮނޑޭގެ އަހަރީ ދުވަހުގެ ލޯގޯ ފަރުމާ ކުރުމުގެ މުބާރާތައް ލޯގޯ ހުށަހެޅުއްވުމަށް ޝަޢުޤުވެރިވެލައްވާ ފަރާތްތަކުން 04 އެޕްރީލް 2024 ވަނަ ދުވަހުގެ 23:59 ގެ ކުރިން ކައުންސިލްގެ އީމެއިލް [email protected] އަށް މެއިލް ކުރައްވައި ލޯގޯތައް ހުށައެޅުމަށް ވަނީ އެދިފަ އެވެ.
އަދި މުބާރާތައް ހުށަހެޅޭ ލޯގޯތަކުގެ ތެރެއިން ހޮވޭ އެންމެ ފުރިހަމަ ލޯގޯއަކަށް ރަމްޒީ އިނާމެއްގެ ގޮތުގައި 3,000 (ތިންހާސް ރުފިޔާ) ދިނުމަށް ކައުންސިލާއި، އަހަރީ ކޮމިޓީއިން ކަނޑައަޅާފައިވާކަމަށް ވެސް އެރަށު ކައުންސިލުން ނެރުނު އިއުލާނުގައި ވެ އެވެ.
