ރައްޔިތުންގެ މަޖިލީހުގެ ސާޖަންޓް އެޓް އާމްސްގެ މަޤާމާ މޭޖަރ (ރޓޑ) ޠަލްޙަތު ޙަސަން ހަވާލުވެވަޑައިގެންފިއެވެ.
މަޖިލީހުގެ އިދާރާގައި މިއަދު ބޭއްވި ރަސްމިއްޔާތެއްގައި ޠަލްހަތު ވަނީ މަގާމުގެ ހުވާކުރެއްވުމަށްފަހު ގަރާރުގައި ސޮއި ކުރައްވާފައެވެ.
މި ރަސްމިއްޔާތުގައި ރައްޔިތުންގެ މަޖިލީހުގެ ރައީސާއި ނައިބު ރައީސްގެ އިތުރުން މަޖިލީހުގެ އިދާރާގެ އިސް ބޭފުޅުން ބައިވެރިވެވަޑައިގެންނެވިއެވެ.
ރައްޔިތުންގެ މަޖިލީހުގެ ސާޖަންޓް އެޓް އާމްސްގެ މަގާމަށް، ކުރިން ސިފައިންގޭގައި މަސައްކަތް ކުރެއްވި ތަލްހަތު އައްޔަން ކުރަން ރައްޔިތުންގެ މަޖީލިހުން ފާސްކުރީ މިދިޔަ މަހުގެ 27 ވަނަ ދުވަހުއެވެ.
މަޖިލިހުގެ ތަޅުމުގައި ނެގި ވޯޓުގައި ގ. ސާޓަނުގެ ތަލްހަތު ހަސަން އައްޔަން ކުރުމަށް ފާސްވީ ވޯޓުގައި ބައިވެރިވެވަޑައިގެންނެވި 35 މެމްބަރުންގެ އިއްތިފާގުންނެވެ.
ތަލްހަތަކީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ސްޓެލްކޯގެ ބޯޑުގައި ވެސް މަސައްކަތް ކުރެއްވި ބޭފުޅެކެވެ.
މަޖިލިހުގެ ސާޖަންޓް އެޓް އާމްސްގެ މަގާމުގައި މީގެކުރިން ހުންނެވީ މުހައްމަދު ހަލީމެވެ. އެކަމަކު، އޭނާ އެ މަގާމުން ވަކި ކުރީ މަޖިލީހުގެ ރައީސާއި ނައިބު ރައީސްގެ އޮފީސްގައި ދައްކާ ވަހަކަތައް ސިއްރުން އަޑުއެހޭނެ ގޮތް ހެދި ކަމަށް ތުހުމަތު ކުރެވޭ މައްސަލައެއްގައެވެ.
