ބޮޑެތި ކުށްތައް ހިންގުމަށް ޖަޒީރާގެ ނަމުގައި ޓެލެގްރާމް ޗެނަލްތަކެއް ހަދައިގެން ހިންގި މައްސަލައިގައި މީހަކު ހައްޔަރުކޮށްފި އެވެ.
ފުލުހުން ބުނި ގޮތުގައި މި މައްސަލައިގެ ތުހުމަތުގައި ހައްޔަރުކޮށްފައިވަނީ އުމުރުން 60 އަހަރުގެ ދިވެހި ފިރިހެނެކެވެ. އޭނާ ހައްޔަރުކޮށްފައިވަނީ މިދިޔަ މަހުގެ 30 ވަނަ ދުވަހު އެވެ.
އެނގިފައިވާ ގޮތުން ހައްޔަރުކުރި މީހާއަކީ ހަށިވިއްކުމުގެ ވިޔަފާރީގައި ބޭނުންކުރި ޓެކްސީއެއްގެ ޑްރައިވަރެކެވެ.
ޖަޒީރާ ޓެލެގްރާމް ޗެނަލްތަކުގެ މައްސަލައިގައި މީގެ ކުރިން ދެމަފިރިން ހައްޔަރުކޮށްފަ އެވެ. އެއީ 28 އަހަރުގެ ފިރިހެނަކާއި 39 އަހަރުގެ އަންހެނެކެވެ.
މީގެ ކުރިން ފުލުހުން ބޭއްވި ނޫސްވެރިންގެ ބައްދަލުވުމެއްގައި ފުލުހުން ހާމަކުރި ގޮތުގައި ޖަޒީރާ ޓެލެގްރާމް ޗެނަލްގެ މައްސަލައިގައި ތުހުމަތުވާ ވަރަށް ގިނަ މީހުން އެބަ ތިއްބެވެ. ފުލުހުން ބުނި ގޮތުގައި ހައްޔަރު ކުރި މީހުން ވަނީ އެ މީހުންގެ މަސައްކަތާ ނުބައްދަލު މާލީ ބޮޑެތި މުއާމަލާތްތަކެއް ވެސް ހިންގާފަ އެވެ. އޭގެ ތެރެއިން ކޮންމެ މީހެއްގެ އެކައުންޓުން ދެ މިލިއަނަށްވުރެ ގިނަ ރުފިޔާ ދައުރުކޮށްފައިވާ ކަމަށްވެސް ފުލުހުން ބުނެ އެވެ.
ގިނަ އަދަދެއްގެ ބަޔަކު ޓެލެގްރާމް ގުރޫޕަށް މެސެޖު ކުރާއިރު މަސްތުވާތަކެތި ހޯދުމަށާއި، ހަށިވިއްކުމަށް ވެސް ވާހަކަ ދެކެވިފައި ވެއެވެ.
މި މައްސަލައިގައި ހައްޔަރު ކުރި މީހުންގެ މައްޗަށް ކުރަނީ މަނީ ލޯންޑްރިންއާއި ޑްރަގް ޓެރެފިކިން އަދި ހަށިއްވިއްކުމާއި ހަށިވިއްކުމަށް ހިތްވަރު ދިނުމާއި، އޮރިޔާން ކާޑު އުފެއްދުމާއި، އޮރުޔާން ކާޑު ބެހުމުގެ ކުށުގެ ތުހުމަތެވެ.
