ދިވެހިންނަށް ލަންކާއިން އޮން އެރައިވަލް 30 ދުވަހުގެ ވިސާ ލިބޭނެ ކަމަށް ފޮރިން މިނިސްޓްރީން ބުނެފި އެވެ.
ރާއްޖޭގެ ޓޫރިސްޓް ވިސާ ސްކީމަށް ދާދި ފަހުން ގެނެވުނު ބަދަލުތައް ސާފުކޮށްދިނުމަށް ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ ރާއްޖޭގައި އައު އީ-ވިސާ ސިސްޓަމެއް އިއުލާންކުރުމާ ގުޅިގެން، ދިވެހި ދަތުރުވެރިންނަށް ވިސާ ކަށަވަރުކޮށްދިނުމަށް ސްރީ ލަންކާގެ ފޮރިން މިނިސްޓްރީ އާއިއެކު މަޝްވަރާތައް ފަށާފައިވާ ކަމަށެވެ.
މިހާރު އަމަލުކުރަމުންދާ އުސޫލުގެ ދަށުން ދިވެހިންނަށް ސްރީ ލަންކާގައި އޮން އެރައިވަލްވާތަނުން ހިލޭ 30 ދުވަހުގެ ޓޫރިސްޓް ވިސާ ލިބޭނެ ކަމަށް ފޮރިން މިނިސްޓްރީން މައުލޫމާތުދީފައި ވެއެވެ. 30 ދުވަހަށްވުރެ ގިނަ ދުވަހު ލަންކާގައި ތިބޭ ދިވެހިންނަށް ހިލޭ 6 މަސްދުވަހުގެ ވިސާއަށް ހުށަހެޅުމަށް އޮންލައިންކޮށް https://www.srilankaevisa.lk/ އިން އެޕްލައި ކުރެވޭނެ އެވެ. މި ވިސާއަށް އިދާރީ ފީއެއް ނަގާނެ ކަމަށް ފޮރިން މިނިސްޓްރީން މައުލޫމާތުދީފައި ވެއެވެ.
މިހާރުވެސް ލަންކާގައި ތިބި ވިސާ އިތުރުކުރަން ޖެހޭ ދިވެހިންނަށް ކޮލަމްބޯގައި ހުންނަ ދިވެހި ހައިކޮމިޝަނަށް ގުޅައިގެން އެކަން ކުރެވޭނެ ކަމަށް ފޮރިން މިނިސްޓްރީން ބުނެ އެވެ.
ލަންކާ އާއި ރާއްޖެއާ ދެމެދު މިހާރު ވެފައިވާ ވިސާ އެއްބަސްވުން ދައްކުވައިދޭ ވިސާ ޕްރޮސެސްއެއް ގާއިމްކޮށް، ދިވެހި ދަތުރުވެރިންނަށް ރެސިޕްރޮސިޓީ ކަށަވަރުކޮށްދިނުމަށް ފޮރިން މިނިސްޓްރީން ވަނީ ވައުދުވެފަ އެވެ. އަދި ބާކީ ހުރި ކަންބޮޑުވުންތަކަށް ހައްލެއް ހޯދުމަށް ލަންކާގެ ކަމާބެހޭ ފަރާތްތަކާއެކު މަޝްވަރާތައް ކުރިއަށް އެބަދާ ކަމަށް މިނިސްޓްރީން ނެރުނު ބަޔާނުގައި ބުނެފައި ވެއެވެ.
