ވޯލްޑް ހެލްތު އޮގަނައިޒޭޝަން (ޑަބްލިއުއެޗްއޯ)ގެ މެންބަރުކަން ފަލަޞްޠީނަށް ލިބުމާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މަރުހަބާ ވިދާޅުވެއްޖެ އެވެ.
ދުނިޔޭގެ ސިއްހަތު ޖަމްއިއްޔާގެ މެންބަރަކަށްވެ، ހަރަކާތްތަކުގައި ބައިވެރިވުމުގެ ފުރުސަތު ފަލަޞްޠީނަށް ލިބިގެންދިޔައީ، އެ ޖަމިއްޔާ 77 ވަނަ އަހަރީ ޖަލްސާގައި އެ ޖަމާއަތުގެ މެންބަރުކަން ދިނުމަށް ހުށަހެޅި ގަރާރު ފާސްކޮށްގެންނެވެ. އެގަރާރަށް 101 ގައުމުން ތާއީދުކުރިއިރު އޭގެތެރޭގައި ރާއްޖެވެސް ހިމެެނެއެވެ. އެކަމާއި ދެކޮޅަށް ފަސް ގައުމަކުން ވޯޓުދިން އިރު، 21 ގައުމަކުން އެއްވެސް ކޮޅަކަަށް ވޯޓު ދީފައެއް ނުވެއެވެ. މިނިންމުމުގެ ސަބަބުން، ތަޅުމުގައި ވޯޓުދިނުމުގެ ހައްގު ފިޔަވައި މެންބަރު ގައުމަކަށް ލިބޭ އެހެން ހުރިހައި ފުުރުސަތުތައް ލިބޭނެއެވެ.އޭގެތެރޭގައި ބަޔާންދީ، މައްސަލަތަކުގައި ބަހުސްކޮށް، މައްސަލަތައް ހުށަހަޅައި، އަދި މައްސަލަތަށް ކޯ ސްޕޮންސަރ ކުރުމުގެ ފުރުސަތު ހިމެނެއެވެ.
ރައީސް ޑރ. މުއިއްޒުވަނީ މި ގަރާރު ފާސްވެ، ފަލަޞްޠީނަށް އެޖަމާތުގެ މެންބަރުކަން ލިބުމުން، އެކަމަށް މަރުހަބާ ވިދާޅުވެފަ އެވެ. އެމަނިކުފާނު ވިދާޅުވީ، ރާއްޖެއިން އެ ގަރާރަށް ތާއީދު ކުރަން ނިންމި ނިންމުމަކީ، ފަލަސްތީނުގެ ރައްޔިތުންނަށް ދައުލަތަކަށް ވުމުގެ ހައްގުތަކާއި، ބައިނަލްއަގުވާމީ ޖަމާޢަތްތަކުގެ ފުރިހަމަ މެންބަރުކަމަށް ދިވެހި ރައްޔިތުންގެ ވަރުގަދަ ތާއީދެއް ދިނުމުގެ ގޮތުންކަމަށެވެ. އަދި، ރާއްޖެއިން ގަބޫލުކުރާގޮތުގައި މި ނިންމުމަކީ ފަލަޞްޠީނުގައި ދެމެހެއްޓެނިވި ސުލްހައެއް ދެމިއޮތުމަށް އެޅުނު މުހިންމު ފިޔަވަޅެއްކަމަށާއި، ފަލަސްތީނުގެ ފުރިހަމަ ދައުލަތަކަށް ދުނިޔޭގެ ފެންވަރުގައި ތާއީދު އިތުރުވުމުގެ ނިޝާނެއްކަމަށް ރައީސް ވިދާޅުވެފައި ވެއެވެ.
ފަލަޞްޠީނު ދުނިޔޭގެ ސިއްހަތު ޖަމްއިއްޔާގެ މެންބަރަކަށްވުމަށް ހުށަހެޅި ގަރާރު ކޯ ސްޕޮންސަރ ކުރީވެސް ރާއްޖެއިންނެވެ. ރާއްޖެއިން ދަނީ އދ އާއި އަދި ބައިނަލްއަގުވާމީ އެކި މައިދާނުގައި ފާޅުގައި ފަލަޞްޠީނުގެ ހައްގުތަކަށް ވަކާލާތުކޮށް، ފަލަޞްޠީނުގެ ކުރިމަަގަށް ކުރެވޭ ކޮންމެ ކަމެއްގައި ތާއީދުކޮށް އެއްބާރުލުން ދެމުންނެވެ.
