މިއަދުން ފެށިގެން، ސިވިލް ކޯޓުގެ ހުޅުމާލެ ޑިވިޝަންގެ ގޮތުގައި ބޭނުން ކުރަމުން ދިޔަ އިމާރާތުގައި، ކްރިމިނަލް ކޯޓުގެ ޝަރީޢަތްތައް ކުރިއަށް ގެންދިއުމަށް ނިންމާފައިވާކަަމަށް ކްރިމިނަލް ކޯޓުން ބުނެފި އެވެ.
މިކަން ހާމަކޮށް ކްރިމިނަލް ކޯޓުން އެކްސްގައި ކުރި ޕޯސްޓެއްގައި ބުނެފައިވަނީ، އެ އިމާރާތުގައި ހުރި ޝަރީޢަތްކުރާ 03 މާލަމުގައި، ކްރިމިނަލް ކޯޓުގެ B2, B3, B5, B8, B10 އަދި B11 މި 06 ސެކްޝަންގެ އަޑުއެހުންތައް ބޭއްވޭނެ އިންތިޒާމުތައް ހަމަޖައްސާފައިވާކަމަށެވެ. ވަގުތީ ގޮތުން މިގެނެވުނު ބަދަލާއި ގުޅިގެން ކޯޓުގެ ބައެއް ސެކްޝަންތައް ހުޅުމާލެ ބަދަލުކުރުމުން، މާލޭގައި ހުރި ކޯޓުގެ އިމާރާތުން ޝަރީޢަތްކުރާ 03 މާލަން ހުސްކުރެވިފައިވާތީ، މިވަގުތު ހުޅުމާލެ މާލަންތަކާއެކު ޖުމްލަ 6 މާލަން ޝަރީއަތްކުރުމަށް ލިބިފައިވާކަމަށް ކްރިމިނަލް ކޯޓުން ބުނެފައި ވެއެވެ.
22 ފެބުރުވަރީ 2023 ގައި ސިވިލް ކޯޓުގެ އިމާރާތުން ބައެއް ބޭނުންނުކުރަން ޖޭއެސްސީ އިން އެންގުމާއި ގުޅިގެން، އަދި އޭގެ ފަހުން ކޯޓުގެ އިމާރާތަށް ފެން ފައިބާ ކަރަންޓު ނިޒާމަށް ފެނުގެ އަސަރުކުރުމުގެ ސަބަބުން، ކޯޓުގެ ޝަރީޢަތްތައް ކުރިއަށް ގެންގޮސްފައިވަނީ ޝަރީޢަތްކުރާ 1 މާލަމުގަ އެވެ. ވޭތުވެ ދިޔަ ދޮޅު އަހަރެއްހައި ދުވަސްތެރޭގައި ކޯޓުގެ އެންމެ މާލަމެއްގައި ޝަރީޢަތްތައް ކުރިއަށް ގެންދިޔަނަމަވެސް، އެ މުއްދަތުގެ ތެރޭގައި 2934 މީހުންގެ ބަންދާމެދު ގޮތެއް ނިންމައި، 2193 ތަފާތު އެކި ކޯޓު އަމުރުތައް ދޫކޮށްފައިވާކަމަށާއި، 520 ޤަޟިއްޔާ ނިންމާފައިވާކަމަށް ކްރިމިނަލް ކޯޓުން ބުނެފައި ވެއެވެ.
