ރައީސް އިބްރާހިމް މުހައްމަދު ސޯލިހުގެ ކޮއްކޯފުޅު އަހުމަދު މުހައްމަދު ސޯލިހު އަވަހާރަވުމާއި ގުޅިގެން ޖަނާޒާގައި ބައިވެރިވެވަޑައިގެންނެވުމަށް އެމަނިކުފާނު ދުބާއީއަށް ފުރާވަޑައިގެންފި އެވެ.
މިއަދު ހެނދުނުގެ ވަގުތެއްގައި ރައީސް ދުބާއީއަށް ވަޑައިގެންނެވީ އާއިލާގެ އެހެން ބައެއް ބޭފުޅުންނާވެސް އެކު އެމިރޭޓްސްގެ ފްލައިޓެއްގަ އެވެ.
މި ނުރަސްމީ ދަތުރުފުޅަށްފަހު ރައީސް އަނބުރާ މާލެ ވަޑައިގަންނަވާނީ އަންނަ ބުދަ ދުވަހު އެވެ.
ރައީސްގެ ކޮއްކޯފުޅު އަހުމަދު މުހައްމަދު ސޯލިހު އަވަހާރަވީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް ހާޓް އެޓޭކެއް ޖެހިގެންނެވެ.
ރައީސް ސޯލިހުގެ އާއިލާގައި އެމަނިކުފާނުގެ އިތުރުން 11 ބޭފުޅަކު ތިއްބަވައެވެ. އޭގެ ތެރޭގައި ލޯފަން ތިން ހާޒިރުން ތިއްބަވަ އެވެ. އިއްޔެ އަވަހާރަވި އަހުމަދު މުހައްމަދު ސޯލިހާކީވެސް ލޯފަން ބޭފުޅެކެވެ. އަހުމަދުވެސް އަވަހާރަވީ ހާފިޒުކަމުގެ ކޯސް ކުރިއަށް ގެންދެވުމަށްފަހު ސިއްހީ ހާލުކޮޅުގެ ސަބަބުން ކިޔެވުން މެދުކަނޑާލައްވާފައި ވަނިކޮށެވެ.
