މަރާލައި އެއްލާލާފައިވާ އުމުރުން 13 އަހަރުގެ ކުއްޖާގެ މަރުގެ މައްސަލާގެ ތަހުގީގަށް ބޮޑެތި ކުރިއެރުންތަކެއް ލިބިފައިވާ ކަމަށް ފުލުހުން ހާމަކޮށްފިއެވެ.
މިމައްސަލައާއި ގުޅޭގޮތުން މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި ފުލުހުން ވިދާޅުވީ، މިމައްސަލާގައި މަރާލެވިފައިވަނީވެސް އަދި އެކި ގޮތްގޮތުން މިމައްސަލާގައި ހިމެނެނީވެސް ކުޑަކުދިންކަމަށެވެ. އެހެންކަމުން މި ހަބަރާއި ގުޅޭ މައުލޫމާތު ފެތުރުމުގައި އެންމެހާ ފަރާތްތަކުންވެސް ކުޑަކުދިންގެ ހައްގުތަކަށް ސަމާލުވުމަށް ފުލުހުންގެ މުއައްސަސާއިން ވަނީ އިލްތިމާސްކޮށްފައެވެ.
ފުލުހުން މައުލޫމާތު ދޭ ގޮތުގައި 13 އަހަރުގެ ކުއްޖާ ރަހީނުކުރި މައްސަލަ ފުލުހުންނަށް ހުށަހެޅީ މިދިޔަ އާދިއްތަ ދުވަހު އެވެ. ފުލުހުން ދިޔައީ އެކުއްޖާ ހޯދަމުންނެވެ.
އެކުއްޖާ މަރާލާފައި އޮއްވާ ފެނުނީ ރޭ ދަންވަރު 2:30 ހާއިރު ހުޅުމާލެ ދެވަނަ ފިޔަވަހިންނެވެ. ކުއްޖާ އޮތީ ކަރުތާފެނާ ހިސާބުން މޫދުގަ އެވެ.
މިމައްސަލައާއި ގުޅިގެން ފުލުހުން ހައްޔަރުކޮށްފައިވަނީ އުމުރުން 17 އަހަރުގެ ފިރިހެން ކުއްޖަކާއި 27 އަހަރުގެ ފިރިހެނެކެވެ. ދެމީހުންގެ އިތުރު ތަފްސީލެއް ފުލުހުން ހާމައެއް ނުކުރެ އެވެ.
