ކުޑަކުދިން ހިމެނޭ މައްސަލަތަކުގެ ހަބަރު ޝާއިއު ކުރުމުގައި އަމަލުކުރަންޖެހޭ މިންގަނޑުތަކާ ހިލާފުވެއްޖެނަމަ ފިޔަވަޅު އަޅާނެކަމަށް މޯލްޑިވްސް މީޑިއާ ކައުންސިލުން ވިދާޅުވެއްޖެއެވެ.
މީޑިއާ ކައުންސިލުން ނެރުނު ނޫސް ބަޔާނުގައި ވަނީ ކުޑަކުއްޖާގެ މަރުގެ މައްސަލާގައި ރާއްޖޭގެ ބައެއް މީޑިއާތަކުގައި ޝާއިއުކޮށްފައިވާ ބައެއް ހަބަރުތަކަކީ ކުޑަކުދިން ހިމެނޭ މައްސަލަތަކުގެ މައުލޫމާތު ޝާއިޢު ކުރުމުގައި، މީޑިއާގައި މަސައްކަތްކުރާ ފަރާތްތަކުން އަމަލުކުރަންޖެހޭ ހަމަތަކާއި މިންގަނޑުތައް ބަޔާން ކުރާ އުސޫލު އަދި ކުޑަކުދިންނާ ގުޅޭ ހަބަރާ މައުލޫމާތު ހާމަކުރުމުގެ ގައިޑްލައިންތަކާ ހިލާފަށް ޝާއިއުކޮށްފައިވާ ހަބަރުތަކެއްކަމަށެވެ. އަދި މީޑިއާ ކައުންސިލުންވަނީ އެކަން ހަރުކަށި އިބާރާތުން ކުށްވެރި ކޮށްފައެވެ.
ރަހީނުކޮށް މަރާލާފައިވާ 13 އަހަރުގެ ކުޑަ ކުއްޖާގެ ފޮޓޯއާއި ނަން އަދި އެކުއްޖާއަކީ ކާކުކަން ދެނެގަނެވޭނެ ފަދަ ޒާތީ އެކި މައުލޫމާތު ބޭނުންކުރުމާއި ސައްހަ ނޫން މައުލޫމާތު ބޭނުންކުރުންފަދަ ކަންކަން އެކައުންސިލްގެ ސަމާލުކަމަށް އައިސްފާވާކަމަށް މީޑިއާ ކައުންސިލުން ހާމަކުރެއެވެ.
