ރާއްޖޭގެ ސުކޫލްތަކުގައި އަރަބި ބަހާއި ކީރިތި ގުރުއާން ކިޔަވައިދޭނެ ޓީޗަރުން އަވަށްޓެރި އިންޑިއާއިން ގެނެސްފައިވަނީ އެމާއްދާތައް ކިޔަވައިދޭން، ބޭނުންވާ މިންވަރަށް ދިވެހި ތީޗަރުން ނުލިބުމުން ކަމަށް އެޑިއުކޭޝަން މިނިސްޓްރީން ހާމަކޮށްފިއެވެ.
އަވަށްޓެރި އިންޑިއާގެ ކެރެލާއިން އަރަބި ބަހާއި ކީރިތި ގުރުއާން ކިޔަވައިދިނުމަށް ޖުމުލަ 10 މުދައްރިސުން ރާއްޖެ ގެނެސްފައިވެއެވެ.
އެގޮތުން ކެރެލާއިން ވަނީ 5 އަރަބި މުދައްރިސުންނާއި 5، ގުރުއާން މުދައްރިސުން ގެނެސްފައެވެ. އަދި އެ މުދައްރިސުން ރާއްޖޭގެ 9 ސްކޫލްއެއްގައި ކިޔަވައިދެމުން އަންނަކަމަށް އެޑިއުކޭޝަން މިނިސްޓްރީން ވަނީ ހާމަކޮށްފައެވެ. އެޑިއުކޭޝަން މިނިސްޓްރީން ބުނީ، އިންޑިއާއިން ތީޗަރުން ގެނެސްފައިވަނީ އެ މާއްދާތައް ކިޔަވައިދޭނެ ދިވެހި މުދައްރިސުން ހޯދުމަށް ތަކުރާރުކޮށް އިއުލާންކޮށް އެމަގާމުތަކަށް ޓީޗަރުން ލިބިފައި ނުވާތީކަމަށެވެ. އަދި އެ މަގާމުތަކަށް މުދައްރިސުން ހޯދުމަށް އެކި ގައުމުތަކުގެ ހައިކަކޮމިޝަން ތަކުގައި އެޑިއުކޭޝަން މިނިސްޓްރީންވަނީ އެހީތެރިކަމަށް އެދިފައެވެ. އެގޮތުން މިހާރު އައިސްފައިވާ ޓީޗަރުންނަކީ އިންޑިއާގެ ސަރުކާރުން ސްޕޮންސަރ ކޮށްފައިވާ އިންޑިއާގެ ރެކްރޫޓުމަންޓް އޭޖެންސީ އެއްކަމަށް "ނޯކާ ރޫޓްސް" މެދުވެރިކޮށް 2020ވަނަ އަހަރު ރެކްރޫޓްކޮށްފައިވާ މުދައްރިސުންކަމަށް މިނިސްޓްރީން ވަނީ ހާމަކޮށްފައެވެ.
