13 އަހަރުގެ ކުއްޖާ މަރާލި މައްސަލައިގާ ރައްޔިތުންގެ މަޖިލީހުގެ މެންބަރުންގެ ކަންބޮޑުވުންތައް ބަންޑުންކޮށްލައިފިއެވެ.
ރަހީނުކޮށް މަރާލާފައިވާ 13 އަހަރުގެ ކުޑަ ކުއްޖާގެ މައްސަލައިގާ ރައްޔިތުންގެ މަޖިލީހުގެ މެމްބަރުން ކަންބޮޑުވުން ފާޅުކޮށްފައިވަނީ، މަޑަވެލި ދާއިރާގެ މެންބަރު ހުސައިން ފިރުޝާން ހުށައެޅުއްވި ކުއްލި މައްސަލައަށް ބަހުސްކުރައްވަމުންނެވެ.
މިމައްސަލާގައި ހުށަހެޅުނު ކުއްލި މައްސަލަ ބަލައިގަނެ، ބަހުސްކުރުމަށް ފާސްވީ، މަޖިލީހުގައި ނެގުނު ވޯޓުގައި ބައިވެރިވި 44 މެންބަރުންގެ އިއްތިފާގުންނެވެ. ކުއްލި މައްސަލައަށް ބަހުސްކުރައްވަމުން މަޑަވެލި ދާއިރާގެ މެމްބަރު ވިދާޅުވީ، 13 އަހަރުގެ ކުއްޖާ އަނިޔާވެރިގޮތަކަށް މަރާލާފައިވާކަން ފުލުހުން ހާމަކުރި ހަބަރާއެކު އިއްޔެ ވެގެންދިޔައީ އަނދިރި ދުވަހަކަށްކަމަށެވެ. މިފަދަ ޖަރިމާތައް ހިންގާ އަނިޔާވެރި މީހުން ރާއްޖޭގައި އުޅޭކަން އެނގުމަކީ ވަރަށް ބިރުވެރިކަމެއްކަމަށް ފިރުޝާން ވިދާޅުވިއެވެ. އެހެން ގައުމުތަކެކޭ އެއްގޮތަށް ދިވެހިރާއްޖޭގައިވެސް ބޮޑެތި ޖަރީމާތައް ހިންގާ މީހުން ފާހަގަވާކަމަށާއި، އެހެން ނަމަވެސް މައުސޫލު ކުޑަކުއްޖަކާމެދު މިހާ ރަހުމްކުޑަ، ލާއިންސާނީ ގޮތަކަށް ދިވެހި ފަސްގަނޑުގައިން ކަންތައްވެގެން ދިއުމަކީ އިންތިހާއަށް ހިތާމަހުރި ކަމެއްކަމަށް އޭނާ ވިދާޅުވިއެވެ.
މިމައްސަލައަށް ބަހުސްކުރެއްވި މެންބަރުން ވަނީ ތަހުޤީގު އަވަސްކޮށް މިކަމުގައި ހިމެނުނު އެންމެން އިންސާފުގެ ކުރިމައްޗަށް ގެނައުމަށް ގޮވާލާފައެވެ. މީގެ އިތުރުން ހަވީރު ހަތަރަކުން ފެށިގެން ކާފިއު އިއުލާންކޮށްފައިވާ ދުވަސްތަކެއްގައި މިފަދަ ނޭދެވޭ ބިރުވެރި އަމަލެއް ހިންގައި ކުއްޖާ މޫދަށް އެއްލާލުމާއި ހަމައަށް އަމަން ބަލަހައްޓާ ފަރާތްތަކުގެ ސަމާލުކަމަށް މިކަން ނައުމަކީ ހިތާމަކުރަންޖެހޭ ކަމެއްކަމަށް މެންބަރުން ވިދާޅުވިއެވެ.
