ކޮވިޑް ފެސިލިޓީތަކުގައި ހުރި މެޝިނަރީއާ ވަސީލަތްތަކުގެ އިތުރުން ބޭހާ އޮކްސިޖަންވެސް ރާއްޖޭގެ ހާލަތަށް ދަތިނުވާވަރަށް އެބަހުރިކަމަށް ހެލްތް މިނިސްޓަރ ނަސީމް ވިދާޅުވެއްޖެއެވެ.
ރާއްޖޭގައި ކޮވިޑްގެ ފަރުވާދިނުމުގައި ހުރި ވަސީލަތްތަކާ ބެހޭ ގޮތުން މަޖިލީހުގެ މައްޗަންގޮޅި ދެކުނު ދާއިރާގެ މެންބަރު އަހުމަދު ހައިތަމް ލިޔުމުން ޖަވާބު ހޯއްދެވުމަށް ކުރެއްވި ސުވާލަށް ލިޔުމުން ޖަވާބު ދެއްވަމުން މިނިސްޓަރ ނަސީމް ވިދާޅުވީ ކޮވިޑަށްދޭ އާއްމު ފަރުވާއާއި ފެސިލިޓީތަކުގެ މަސައްކަތްކުރާ މުވައްޒަފުންނާއެކު، 2460 ސިއްހީ އެހީތެރިން މަސައްކަތުގައި ހަރަކާތްތެރިވަމުންދާކަމަށެވެ. މިނިސްޓަރ ނަސީމް ވިދާޅުވީ ފަރުވާއަށް ބޭނުންވާ އޮކްސިޖަން ލިބުމުގައިވެސް ދަތިކަމެއް ނެތްކަމަށާއި މޯލްޑިވް ގޭހުގެ 3 ޕްލާންޓާ، އައިޖީއެމް ހޮސްޕިޓަލާ ކުޅުދުއްފުށި އަދި އައްޑޫގައި ހުރި އޮކްސިޖަން ޕްލާންޓުން ބޭނުންވާ މިންވަރަށް އޮކްސިޖަން އުފައްދަމުންދާ ކަމަށެވެ.
ނަސީމްގެ ޖަވާބުގައި ރާއްޖޭގައި މިވަގުތު 5700 އޮކްސިޖަން ޖަމްބޯ ސިލިންޑަރު އެބަހުރި ކަން ވަނީ ފާހަގަކޮށްފައެވެ. އަދި މި ތަކެތީގެ ތެރެއިން ފެސިލިޓީތަކަށް ބޭނުންވާ މިންވަރަށް ސިލިންޑަރު މިހާރު ވަނީ ފޮނުވާފައިކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ކޮވިޑް ހާލަތު ރާއްޖޭގައި މާބޮޑަށް ގޯސްވެއްޖެނަމަ، އެހެން ފަރުވާތައް ހުއްޓާލުމަށްފަހު ސިއްހީ ދާއިރާގައި މަސައްކަތްކުރާ މީހުންގެ %40 ބޭނުންކުރާނީ ކޮވިޑް ބަލީގެ ފަރުވާއަށް އެހީވުމަށްކަމަށެވެ.
