އަންހެނުން ހިތާނުކުރުމުގެ ނަމުގައި ހިންގާ، ފީމޭލް ޖެނިޓަލް މިއުޓިލޭޝަން (އެފްޖީއެމް) އަށް ހިތްވަރު ލިބޭގޮތަށް ޑރ އިޔާޒު ކުރެއްވި ޓުވީޓާއި ގުޅިގެން މައްސަލަ ބަލައިދިނުމަށް މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގައި އެދިއްޖެއެވެ.
ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް މިއަދު މަޖިލީހުގެ ރައީސް އަށް ފޮނުއްވާފައިވާ ސިޓީގައި ބުނެފައިވަނީ މިއަދުގެ 9:14 ގައި ޓުވީޓެއް މެދުވެރިކޮށް ދިވެހިރާއްޖޭގެ ގައުމީ ޔުނިވަރސިޓީގެ އެސިސްޓަންޓް ޕްރޮފެސަރ ޑރ މުހައްމަދު އިޔާޒު، އަންހެނުން ހިތާނުކުރުމުގެ ނަމުގައި ހިންގައި ފީމޭލް ޖެނިޓަލް މިއުޓިލޭޝަން (އެފްޖީއެމް) އަށް ހިތްވަރުދީފައި ކަމަށެވެ. މިފަދަ ނުރައްކާތެރި އަމަލުތަކަށް ހިތްވަރު ލިބޭ ގޮތަށް މުއައްސަސާތަކުގެ ޒިންމާދާރު މަގާމުތަކުގައި ތިއްބަވާ ބޭފުޅުން މަސައްކަތް ކުރެއްވުމަކީ ދިވެހިރާއްޖޭގެ އަންހެނުން ނުރައްކަލަށް ހުށަހެޅި އަންހެނުންގެ ހައްގުތައް ރައްކާތެރިކުރުމަށް ހުރަސް އެޅޭނޭ ކަމަކަށް ވާތީ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީ މެދުވެރިކޮށް މިމައްސަލަ ބައްލަވައިދިނުމަށް އެދޭ ކަމަށެވެ.
ޑރ އިޔާޒު މިއަދު ކޮށްފައިވާ ޓުވީޓުގައި ވަނީ އަންހެނުން ހިތާނުކުރުމުން ލިބޭ ފައިދާ ތަކާއި ގުޅޭގޮތުން ވެބްސައިޓެއްގައި ޝާއިއުކޮށްފައިވާ އިލްމީ ދިރާސާއެއް ހިއްސާކޮށްފައެވެ. މީކާއިލްގެ މި ސިޓީއަށް ރައްދުދެއްވާ ޑރ އިޔާޒު ވިދާޅުވެފައިވަނީ ބަޔަކު ކޮށްފައިވާ އިލްމީ ދިރާސާއެއް ހިއްސާ ކުރުމުން މަޖިލިސްއަށް ގަރާރުލާ ވަޒީފާއިން ވަކި ކުރުމަށް ޕްރެޝަރ ކުރުމަކީ ހައްލެއް ނޫން ކަމަށެވެ.
