ފޮރިން މިނިސްޓަރ ޑރ. އަބްދުﷲ ޚަލީލް މިއަދު ވަނީ އޮމާންގެ ފޮރިން މިނިސްޓަރ ސައްޔިދު ބަދުރު ބިން ޙަމަދު ބިން ޙަމޫދު އަލްބުސަޢީދީގެ ދަޢުވަތަކަށް ރަސްމީ ދަތުރުފުޅެއްގައި އޮމާނަށް ފުރާވަޑައިގެންފިއެވެ. މި ދަތުރުފުޅަކީ 10 އިން 13 އަށް ކުރައްވާ ދަތުރުފުޅެއް ކަމަށް ފޮރިން މިނިސްޓްރީން ބުނެފައިވެއެވެ.
ދަތުރުފުޅުގެ ތެރޭގައި ޑރ. ޚަލީލް ވަނީ އޮމާންގެ ފޮރިން މިނިސްޓަރާ ބައްދަލުކުރައްވާ، ދެ ގައުމުގެ ދެމެދުގައި އޮންނަ ގުޅުން އިތުރަށް ހަރުދަނާކުރެވޭނެ ގޮތްތަކާމެދު މަޝްވަރާކުރެއްވުމަށް ހަމަޖެހިފައެވެ. އަދި މީގެ އިތުރުން އޮމާން ސަރުކާރުގެ އިސްވެރިންނާވެސް ބައްދަލުކުރައްވާ، އެކި ދާއިރާތަކުން ގުޅުން ވަރުގަދަކުރުމުގެ ފުރުސަތުތަކާމެދު މަޝްވަރާކުރެއްވުމަށް ހަމަޖެހިފައިވެއެވެ.
މިނިސްޓަރ ޑރ. ޚަލީލްގެ މި ދަތުރުފުޅުގައި ސެކްރެޓަރީ، ބައިލެޓަރަލް، ޑރ. ހާލާ ހަމީދާއި، ސީނިއަރ އަންޑަރ ސެކްރެޓަރީ ފާޠިމަތު ނަޢީމާ އަދި އެސިސްޓަންޓް ޑިރެކްޓަރ މުޙައްމަދު ޝުޖާޢު ބައިވެރިވެވަޑައިގަންނަވައެވެ.
