ކޮވިޑްޖެހުމަށްފަހު ރަނގަޅުވާ ކުދިންނަށް ޖެހެމުން އަންނަ މިސްކް ބަލި މިހާތަނަށް ފެނިފައިވަނީ މާލެ އަދި ފާފު އަތޮޅުން ކަމަށް ޑރ އަހުމަދު ފައިސަލް ވިދާޅުވެއްޖެއެވެ.
ފައިސަލް ކުރެއްވި ޓުވީޓެއްގައި ވިދާޅުވީ މިސްކް ބަލީގެ އިތުރުން ޑެންގީ ހުން ފެނިފައިވަނީ އަރިއަތޮޅުން ކަމަށެވެ. މިސްކް ބައްޔަކީ ގައިން ގަޔަށް އަރާ ބައްޔެއް ނޫން ކަމަށާއި ގައިން ގަޔަށް އަރަމުންދަނީ ކޮވިޑް ކަމަށް ޑޜ ފައިސަލް ވިދާޅުވިއެވެ.
ޑރ ފައިސަލް ވިދާޅުވީ މިސްކް ބަލި މަދުކުރުމަށް ކުރަން ޖެހޭނެ ކަމަކީ ކޮވިޑް މަދުކުރުން ކަމަށެވެ. އަދި ކޮވިޑުން ރަނގަޅުވިޔަސް 4 ހަފްތާއަށް ބަލަން ޖެހޭ ކަމަށާއި ހުންގަދަވެ އިތުރު އަލާމާތްތައް ހުންނަންޏާ ޑޮކްޓަރަށް ދައްކަންވާނެ ކަމަށްވެސް ޑރ ފައިސަލް ވިދާޅުވިއެވެ.
"މަލްޓި ސިސްޓަމް އިންފްލެމޭޓްރީ ސިންޑްރަމް" (މިސްކް) ކިޔާ އެ ބަލީގެ އަލާމާތްތަކުގެ ތެރޭގައި ގަދަ ހުމާ އެކު ކަރާއި ގައިގައި ރިއްސުމާއި ހޮޑުލުން އަދި ލޭގެ ޕުރެޝަރު ދަށްވުން ފަދަ ކަންކަން ހިމެނޭނެ ކަމަށާއި އަތާއިފައި އަދި ހަށިގަނޑު ރަތްވުމާއި އަތާއިފައި ދުޅަވުމުގެ އިތުރުން އަތާއި ފައިން ހަންފޮޅުން ފަދަ އަލާމާތްތައް ވެސް މި ބަލީގައި ފެންނަ ކަމަށްވެސް ޑރ ފައިސަލް ވިދާޅުވިއެވެ.
ޑރ. ފައިސަލް ވިދާޅުވެފައިވަނީ މިސްކް ބަލި ޖެހިފައިވާ ކަމަށް ބަލަނީ ހަ ކަމެއް ހުރުމުން ކަމަށެވެ. އޭގެ ތެރޭގައި ކުޑަކުއްޖަކަށް ވުމާއި ހުން ހުރުމާއި އެހެން ބައްޔެއްގެ އަލާމާތްތަކެއް ނެތުން ހިމެނެ އެވެ. މި ބަލި ޖެހެނީ ކޮވިޑް ޖެހިފައި ނުވަތަ ކޮވިޑް ޖެހުނު މާހައުލެއްގައި އުޅޭ ކުދިންނަށެވެ.
