ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ބޯޑު މެންބަރުންގެ ސަސްޕެންޝަން އުވާލައިފި އެވެ.
އެޗްޑީސީގެ ޗެއާމަން ފިޔަވާ ބޯޑުގައި ހިމެނޭ ހުރިހާ މެންބަރުން މިމަހުގެ 19 ވަނަ ދުވަހު ސަސްޕެންޑް ކުރީ ބިންވެރިޔާ ސްކީމްގައި ނުހިމެނޭ ބަޔަކަށް ގޯތިތަކެއް ދީފައިވާ މައްސަލަ ފެންމަތިވެ ޖިނާއީ ތަހުގީގެއް ދައުލަތުގެ އިދާރާތަކުން ފެށުމާ ގުޅިގެންނެވެ.
މިމައްސަލައިގެ ތަހުގީގު ހިނގަމުން ދަނިކޮށް މައްސަލަ ފެންމަތިވިއިރު މެނޭޖިން ޑިރެކްޓަރުގެ މަގާމުގައި ހުންނެވި ފަޒުލް ރަޝީދު ވަނީ މިދިޔަ ހޮނިހިރު ދުވަހު މަގާމުން އިސްތިއުފާ ދެއްވާފަ އެވެ. އަދި ޖެހިގެން އައި އާދިއްތަ ދުވަހު ސަރުކާރުން ނަން ފޮނުވުމާ ގުޅިގެން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން ވަނީ އެޗްޑީސީގެ މެނޭޖިން ޑިރެކްޓަރުގެ މަގާމަށް ކުރީގެ ވަޒީރު މައުރޫފް ޖަމީލް އައްޔަންކުރައްވާފަ އެވެ.
ޕްރައިވެޓައިޒޭޝަން ބޯޑުން މިއަދު ބުނީ އެޗްޑީސީގެ މެނޭޖިން ޑިރެކްޓަރުގެ މަގާމަށް މައުރޫފް އައްޔަންކޮށްފައިވާތީ އެ ކުންފުނީގެ ޑިރެކްޓަރުންގެ ބޯޑުގެ މެންބަރުންގެ ސަސްޕެންޝަން މިއަދުން ފެށިގެން އުވާލާފައިވާ ކަމަށެވެ.
