ޓޫރިޒަމް މިނިސްޓްރީގެ ސްޓޭޓް މިނިސްޓަރު މުހައްމަދު ނިހާދު ސަސްޕެންޑްކޮށްފި އެވެ.
އައްޑޫ ފޭދޫ ދާއިރާގެ ކުރީގެ މެންބަރު ނިހާދު ސަސްޕެންޑް ކުރީ ވެރިކަން ކުރާ ޕީއެންސީ އިން ރޭ ބޭއްވި ޖަގަހަ ޖަލްސާގައި ދެއްކެވި ވާހަކަތަކަކާ ގުޅިގެންނެވެ.
މިޖަލްސާގައި ނިހާދު ވަނީ ރާއްޖެ އަށް ދެ މިލިއަން ވަނަ ފަތުރުވެރިޔާ އައުމަށް ތައްޔާރުވަމުންދާއިރު އިދިކޮޅު އެމްޑީޕީ އިން ޓެރަރިސްޓް ހަމަލާއެއް ދޭން އުޅޭ ކަމަށް ދޭހަވާ ގޮތަކަށް ވާހަކަދައްކަވާފަ އެވެ.
ނިހާދުގެ ވާހަކަތައް ކުށްވެރިކޮށް އިދިކޮޅު އެމްޑީޕީ އިން މިއަދު ވަނީ ބަޔާނެއްވެސް ނެރެފަ އެވެ.
މިބަޔާނުގައި ވަނީ ނިހާދު ދެއްކި ވާހަކަތައް ދޮގުކޮށް އެކަން ހަރުކަށި އިބާރާތުން ކުށްވެރިކޮށްފަ އެވެ. އެމްޑީޕީ އިން ބުނީ ނިހާދު ކުރެއްވި ތުހުމަތަކީ ޓޫރިޒަމް މިނިސްޓްރީގެ ސްޓޭޓް މިނިސްޓަރެއްގެ މަގާމުގައި ހުންނެވި ބޭފުޅަކު އެއްވެސް ހާލެއްގައި ކޮށްގެން ނުވާނެ ފަދަ ސީރިއަސް ތުހުމަތެއް ކަމަށެވެ.
"ވެރިކަން ކުރާ ޕާޓީން މިފަދަ ހަގީގަތާ ހިލާފު ތުހުމަތުތައް ކުރަމުން ދިއުމަކީ ފޫނުބެއްދޭ ވަރުގެ ގެއްލުންތަކަކާ ރާއްޖޭގެ ޓޫރިޒަމް އިންޑަސްޓްރީ ކުރިމަތިލާން ޖެހިދާނެ ކަމެއް ކަމަށް މި ޕާޓީން ދެކެމެވެ،" އެމްޑީޕީގެ ބަޔާނުގައިވެ އެވެ.
އަވަސްއާ މިއަދު ވާހަކަދެއްކެވި ސަރުކާރުގެ އޮފިޝަލަކު ވިދާޅުވީ ޓޫރިޒަމް މިނިސްޓްރީގެ އިސް މަގާމެއްގައި ހުންނަވައިގެން ރާއްޖޭގެ ފަތުރުވެރިކަމާ ގުޅުވައިގެން ނިހާދު ދައްކަވާފައިވަނީ އެންމެ ރަނގަޅު ވާހަކަތަކެއް ނޫން ކަމަށެވެ.
