ސިޔާސީ މަންފާއެއް ހާސިލް ކުރުމަށްޓަކައި އެއްވެސް އަސާސެއްނެތި ގާނޫނާއި ހިލާފަށް މީހުން ހިފާ ހައްޔަރު ކުރުމަކީ ކޮށްގެންވާނެ ކަމެއް ނޫން ކަމަށް އިދިކޮޅު ކޯލިޝަނުން ބުނެފިއެވެ.
ޕީޕީއެމް ޕީއެންސީ ކޯލިޝަނުން ނެރުނު ނޫސްބަޔާނެއްގައި ބުނެފައިވަނީ، އެއްވެސް މީހަކު ހިފާހައްޔަރުކޮށް ބެހެއްޓޭނެ ގޮތްތައް ގާނޫނު އަސާސީގެ 49 ވަނަ މާއްދާގައްޔާ ޖިނާއީ އިޖުރާތުގެ ގާނޫނުގެ 58 ވަނަ މާއްދާއާއި 59 ވަނަ މާއްދާއާއި 60 ވަނަ މާއްދާގައި ވަރަށް ސާފުކޮށް ބަޔާންކުރެވިފައިވާ ކަމަށާއި އެހެންކަމުން ގިނަ އަދަދެއްގެ ބަޔަކު ހިފައި ހައްޔަރު ކުރަންޖެހޭ ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެފައިވާތީ އެކަމާ އެ ކޯލިޝަނުން ކަންބޮޑުވުން ފާޅުކުރާ ކަމަށެވެ.
ޓެރަރިޒަމް ހުއްޓުވުމަށްޓަކައި ގާނޫނީ އިމުގެ ތެރެއިން މަސައްކަތް ކުރުމަކީ ކުރަންޖެހޭ ކަމެއް ކަމަށް އެކޯލިޝަނުން އަބަދުވެސް ގަބޫލުކުރާ ކަމެއް ކަމަށެވެ. އަދި ޓެރަރިޒަމް ހުއްޓުވުމަށްޓަކައި ރައީސް ޔާމީންގެ ޒައާމަތުގައި ގިނަ މަސައްކަތްތަކެއް ކުރެވިފައިވާ ކަމަށްވެސް އެ ކޯލިޝަނުން ބުނެފައިވެއެވެ.
ގާނޫނު އަސާސީއާއި ހިލާފަށް އެއްވެސް ހިފައި ހައްޔަރު ކުރުމަކީ ކޮށްގެން ވާނެ ކަމެއް ނޫން ކަމަށްވެސް ބުނެފައިވެއެވެ.
