ނިމުނު ދިރާސީ އަހަރުގައި ކިޔެވުމަށް ދަރިވަރުން އިންޓަރނެޓް ބޭނުންކޮށްފައިވާތީ، ރައްކާތެރި ގޮތުގައި އިންޓަރނެޓް ބޭނުން ކުރަން ދަސްކޮށްދީ ހޭލުންތެރި ކުރުމުގެ ގޮތުން 'ސައިބަރ ސޭފްޓީ'ގެ ނަމުގައި ކެމްޕޭނެއް އިފްތިތާހްކޮށްފިއެވެ.
މި ކެމްޕޭނަކީ މިނިސްޓްރީ އޮފް އޭޑިޔުކޭޝަނާއި، ޔުނިސެފް މޯލްޑިވްސް އާއި ވިމެން އިން ޓެކް މޯލްޑިވްސް ގުޅިގެން ހިންގާ ކެމްޕޭނެކެވެ. އެޑިއުކޭޝަނުން ހާމަކުރާ ގޮތުގައި މިކެމްޕޭނުގެ މަގުސަދަކީ އޮންލައިންކޮށް ކިޔެވުމަށާއި ކިޔަވައިދިނުމަށް ޖެހިފައިވާ މިދުވަސްވަރު، ދަރިވަރުންނާއި، ބެލެނިވެރިންނާއި ޓީޗަރުން، އިންޓަރނެޓް ބޭނުންކުރުމުގައި ދިމާވެދާނެ ކަންތައްތަކާ މެދު އަހުލުވެރި ކުރުވުމާއި، ރައްކާތެރިކޮށް އިންޓަރނެޓް ބޭނުންކުރުމުގެ މައުލޫމާތު ދިނުމެވެ.
މިކެމްޕޭނުގެ ދަށުން އެނިމޭޓެޑް ވީޑިއޯ، ޕޯސްޓަރު އަދި ޗެޓްބޮޓް މެދުވެރިކޮށް، ރައްކާތެރިކަމާއެކު، އިންޓަރނެޓް ބޭނުންކުރުމުގެ އެކި އެކި މައުޟޫތަކަށް މައުލޫމާތު ދިނުމަށް ހަމަޖެހިފައިވާއިރު އޮންލައިކޮށް ހިއްސާ ކުރާ އަމިއްލަ އަދި ސިއްރު މައުލޫމާތަކީ ކޮބައި ކަމާއި މިފަދަ މައުލޫމާތު އޮންލައިންކޮށް ހިއްސާކުރުމުގައި ރައްކާތެރިވާންވީ ގޮތުގެ މައްޗަށް މައުލޫމާތު ދެވޭނެކަމަށް މިނިސްޓްރީން ހާމަކުރެއެވެ.
