ދީނީ ގޮތުން ހިޔާލު ފާޅުކުރައްވައި ބައެއް މައްސަލަތަކާއި ގުޅިގެން ސޯޝަލް މީޑިއާގައި ދައްކަވާ ވާހަކަތަކުގެ ސަބަބުން މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ އެސިސްޓެންޓް ޕްރޮފެސަރު ޑރ. މުހައްމަދު އިޔާޒު ވަޒީފާއިން ވަކިކުރުމާއި ގުޅިގެން އޭނާގެ ދިފާއުގައި ހޯމް މިނިސްޓަރު އިމްރާން އަބްދުﷲ ތެދުވެވަޑައިގެންފި އެވެ.
އިޔާޒު ވަޒީފާއިން ވަކިކޮށްފައިވަނީ އަންހެނުން ހިތާނު ކުރުމާއި ގުޅިގެން އޭނާ ދެއްކެވި ވާހަކަތަކެއް ހޫނުވެ މަޖިލީހަށްވެސް އެމައްސަލަ ހުށަހަޅާފައިވާ ދަނޑިވަޅެއްގަ އެވެ. މީގެ ކުރިންވެސް އިޔާޒު ދެއްކެވި ބައެއް ވާހަކަތަކާއި ގުޅިގެން އޭނާއަށް އިންޒާރު ދީފައި ވެއެވެ. މިދިޔަ މާޗު މަހުގެ ތެރޭގައި 14 ދުވަހުގެ ސަސްޕެންޝަނެއްވެސް އޭނާއަށް އައެވެ.
މިމައްސަލައިގައި ސަރުކާރު ކޯލިޝަންގައި ހިމެނޭ އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން ވިދާޅުވީ އިޔާޒް އަކީ ރާއްޖޭގެ އިސްލާމީ ޝަހުސިއްޔަތު ހަރުދަނާކުރުމަށް ދީނީ އިލްމުވެރިއެއްގެ ހައިސިއްޔަތުން ގިނަ ހިދުމަތްތަކެއް ކުރައްވާ ބޭފުޅެއް ކަމަށެވެ. އަދި ފިހުގީ ރައުޔުތަކާއި އެއްބަސްނުވެވުނު ނަމަވެސް އިޔާޒު އާއިމެދު އެމްއެންޔޫއިން އެޅި ފިޔަވަޅު އިންސާވެރިކަމަށް ދެންނެވެން ނެތްކަމަށް އިމްރާން ވިދާޅުވި އެވެ.
ދީނީ ހިލާފުތަކާމެދު އިލްމީ މުއައްސަސާތަކުގައި މިނިވަންކަމާއެކު އިލްމީ ގޮތުން ރީތި، އަހުލާގީ ބަހުސްކޮށް ހައްލު ހޯދެންވާނެ.
- ހޯމް މިނިސްޓަރު އިމްރާން އަބްދުﷲ
މަޝްވަރާގެ ދޮރު ބަންދުކޮށް ރާއްޖޭގެ އެންމެ ބޮޑު ޔުނިވާސިޓީން ހަރުކަށިކަން އިސްކުރުމަކީ ބަލައިގަނެވޭނެ ކަމެއް ނޫންކަމަށްވެސް އިމްރާން ވަނީ ވިދާޅުވެފަ އެވެ. އިމްރާން އިޔާޒުގެ ދިފާއުގައި ނިކުންނެވިއިރު އަދާލަތު ޕާޓީންވެސް ވަނީ އެކަން ކުށްވެރިކޮށް ބަޔާނެއް ނެރެފަ އެވެ. އެޕާޓީން ބުނާ ގޮތުގައި އިޔާޒުއާއިމެދު ފިޔަވަޅު އެޅީ ދީނާއި ދެކޮޅު ބަޔަކު އިސްވެ ތިބެ އެވެ.
އިޔާޒުގެ ދިފާއުގައި އެހެން ބައެއް ދީނީ އިލްމުވެރިންވެސް ވާހަކަ ދައްކަވާއިރު އިލްމުވެރިން ވިދާޅުވަނީ އިޔާޒު އާއިމެދު އެޅި ފިޔަވަޅު އިންސާފުވެރި ނޫން ކަމަށެވެ.
އިޔާޒުގެ މައްސަލަ ހޫނުވެ އިސްލާމިކް މިނިސްޓްރީންވެސް ގެންދަނީ އެކަންކަން ބަލަމުންނެވެ. އަދި މަޖިލީހުންވެސް ވަނީ އިޔާޒު ދެއްކެވި ވާހަކަތަކެއްގެ މައްސަލަ ބަލަން ފަށައިފަ އެވެ. އިޔާޒު އެންމެ ފަހުން ސޯޝަލް މީޑިއާ ހަލަބޮލި ކޮށްލީ އަންހެނުން ހިތާނު ކުރުމަކީ ދީނުގައި އޮންނަ ކަމެއްކަމަށް ބުނެ ވާކަހަތަކެއް ދައްކަވަމުންނެވެ.
