ލ. ގަން ކައިރީގައި އޮންނަ 'މަހަކަންފުށި' ފަޅު ރަށް ކައިރިއަށް މަސް ހިފަން ފައިބާ އުޅުނު ފިރިހެނަކު ގެއްލިގެން ހޯދަމުން ދަނިކޮށް މަރުވެފައި އޮއްވައި ފެނިއްޖެއެވެ.
އެކަމާ ގުޅިގެން ގަމު ކައުންސިލުން ކުރި ޕޯސްޓެއްގައި ބުނީ މިއަދު ހެނދުނު ބަޔަކާ އެކުގައި މަހަކަންފުށި ކައިރިއަށް، ދާ ޖަހަގެން މަސް ހިފަން ދިޔަ އަބުދުލްސަމަދު މުހައްމަދު (ސަމަދު) ތުނޑީ، ފެސްފަރީ ލ. ގަން، ގެެއްލިގެން ހޯދުމުގެ މަސައްކަތް ކުރިއަށް ދާ ކަމަށެވެ.
ފުލުހުންގެ މީޑިއާ އޮފިޝަލް ވިދާޅުވީ، އެރަށް ކައިރިއަށް މަސް ހިފަން މޫދަށް ފައިބައިގެން އުޅުނު މީހަކު ގެއްލިފައިވާ މައްސަލަ މިއަދު 9:50 ހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.
އަދި އެމީހާ ގެއްލިގެން ހޯދަމުންދަނިކޮށް މޫދުގައި، މަރުވެފައި އޮއްވާ ފެނިފައިވާ ކަމަށްވެސް އޮފިޝަލް ވިދާޅުވިއެވެ.
އެ މީހާ މިހާރު ވަނީ ގަމު ހޮސްޕިޓަލަށް ގެންގޮސްފައެވެ.
