އާއްމުކޮށް ހުޅުވާލައިގެން ކޮވިޝީލްޑް ވެކްސިންގެ ދެވަނަ ޑޯޒް ޖަހަން ފަށައިފިއެވެ.
ހެލްތް ޕްރޮޓެކްޝަން އެޖެންސީން އާއްމުކޮށްފައިވާ ގޮތުން މިއަދުން ފެށިގެން ޓޯކަން ނަމްބަރު ދޫކޮށްގެން މާލެ ސަރަހައްދުގެ ހަތަރު ސެންޓަރަކުން ވަނީ ކޮވިޝީލްޑްގެ ދެވަނަ ޑޯޒް ޖެހުމުގެ ފުރުސަތު ހުޅުވާލައިފައެވެ.
އެގޮތުން ފެބްރުއަރީ އެކަކުން ފަނަރަ މާރޗްގެ ނިޔަލަށް ކޮވިޝީލްޑް ވެކްސިންގެ ފުރަތަމަ ޑޯޒް ޖަހާފައިވާ ފަރާތްތަކަށް ކިއުބީ ނަމްބަރު ދޫކޮށްގެން ދެވަނަ ޑޯޒް ޖަހަން ވަނީ ހުޅުވާލާފައެވެ.
ޓޯކަން ނަމްބަރު އޮންލައިންކޮށް ދޫކުރާއިރު ސޯސަލް ސެންޓަރުން 200 ޑޯޒް، އިސްލާމިކް ސެންޓަރުން 200 ޑޯޒް، ހުޅުމާލޭ ވެކްސިނެޝަން ސެންޓަރުން 120 ޑޯޒް އަދި ނެޝަނަލް އާރޓް ގެލަރީން 70 ޑޯޒް ޖެހުމުގެ ފުރުސަތު ހުޅުވާލާފައިވެއެވެ.
ރާއްޖެއަށް ގެނައި ކޮވިޝީލްޑް ވެކްސިންގެ އާ ޝިޕްމެންޓަކީ ދިވެހި ސަރުކާރުން، އިންޑިއާގެ ސިރަމް އިންސްޓިއުޓުން ގަތް ވެކްސިން ނޫން ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ވަނީ ބުނެފައެވެ. އިންޑިއާގެ ސިރަމް އިންސްޓިޓިއުޓާއެކު އެއްބަސްވުމެއް ގާއިމްކޮށް 300،000 ކޮވިޝީލްޑް ޑޯޒް ގަންނަން ސަރުކާރުން ފައިސާ ދެއްކި އެވެ. އޭގެ ތެރެއިން މިހާތަނަށް ލިބުނީ 100،000 ޑޯޒް އެވެ. ކޮވިޝީލްޑް ވެކްސިންގެ އިތުރު ޑޯޒްތަކެއް ރާއްޖެއަށް ލިބުނުއިރު އެއީ ސިރަމް އިންސްޓިޓިއުޓުން ގަތް ވެކްސިން ނޫންކަމަށް އެޗްޕީއޭއިން ބުނެ އެވެ.
