އިންސާފު ހޯދައިދިނުމާއި، އިގްތިސޯދީ މަސައްކަތްތަކުގެ އިތުރުން އިޖުތިމާއީ ހާލަތު ރަނގަޅު ކުރުމުގައި އުއްމީދު ކުރި ވަރުގެ ކުރިއެރުންތަކެއް ސަރުކާރަށް ހޯދިފައި ނުވާކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައްޔިތުންގެ މަޖިލީހުން އިންތިޒާމުކޮށްގެން ގެނަސްދޭ "އާސްކް ސްޕީކާ" ޕްރޮގުރާމުގެ ތިންވަނަ އެޕިސޯޑުގައި ރޭ ވާހަކަ ދައްކަވަމުން ރައީސް ނަޝީދު ވަނީ ރާއްޖޭގައި ހުރި ގިނަ މައްސަލަތަކާއި ގުޅިގެން ވާހަކަފުޅު ދައްކަވައިފަ އެވެ. ގާތްގަނޑަކަށް ދޮޅު ގަޑިއިރަށް ދެމިގެންދިޔަ މި ޕްރޮގުރާމުގައި ކްލަބް ހައުސް މެދުވެރިކޮށް ވީޑިއޯ، އޯޑިއޯ އަދި ޓެކްސްޓް މެސެޖު މެދުވެރިކޮށްވެސް ސުވާލު ނަންގަވައި ޖަވާބު ދެއްވި އެވެ.
ޕްރޮގުރާމު ނިންމަވައިލެއްވުމުގެ ތެރެއިން ވާހަކަފުޅުދައްކަވަމުން ނަޝީދު ވިދާޅުވީ ސަރުކާރަށް ފާޑު ވިދާޅުވުމުގެ ބޭނުމުގައި ނޫން ނަމަވެސް ހަގީގަތަށް ވާހަކައެއް ދަންނަވަން ބޭނުންވެވަޑައިގަންނަވާ ކަމަށެވެ.
"އަޅުގަނޑަށް ދިމާވެފަ ހުރި ކަންތައް ދިމާވެފަ ހުރި ގޮތުން އަޅުގަނޑަށް ދެންނެވޭނީ އަޅުގަނޑު އެދުނު މިސްރާބަށް ސަރުކާރެއް ނުދެޔޭ. އަދި އަޅުގަނޑު އެއީ ކިހިނެއް ވެގެންތޯ އިގްތިސޯދީ ގޮތުންވެސް. އަދި އާންމު ހާލަތު ރަނގަޅު ކުރުމަށްވެސް. އިންސާފު ހޯދައިދިނުމުގަވެސް"
- ރައްޔިތުންގެ މަޖިލީހުގެ ރައީސް މުހައްމަދު ނަޝީދު
މިހުރިހާ ކަމެއްގައިވެސް އުއްމީދު ކުރި އަމާޒަށް ނުދެވެނީ ކީއްވެގެންތޯ ބަލާއިރު އެންމެ ބޮޑަށް ފާހަގަކުރެވެނީ ނިޒާމުގެ މައްސަލަ ކަމަށް ނަޝީދު ވިދާޅުވި އެވެ. ނަޝީދު އިޝާރާތް ކުރެއްވީ މިހާރު ވެރިކަން ހިންގާ ރިޔާސީ ނިޒާމަށެވެ. އެމަނިކުފާނު ދެކެވަޑައިގަންނަވަނީ ރާއްޖެ ހިންގުމުގެ އެންމެ ރަނގަޅު ނިޒާމަކީ ބަރުލަމާނީ ނިޒާމު ކަމަށެވެ.
ނަޝީދު ވަނީ ޕީޕީއެމްއާއި ރައީސް ޔާމީންގެ އަރިހުން ނިޒާމު ބަދަލު ކުރުމުގެ މަސައްކަތުގައި އެމަނިކުފާނާއެކު މަސައްކަތް ކުރެއްވުމަށް އެދިވަޑައިގެންފަ އެވެ. ނަޝީދު ވިދާޅުވާ ގޮތުން ރައީސް ޔާމީން ތާއީދު ކުރައްވަނީ ބަރުލަމާނީ ނިޒާމަކަށެވެ.
އެހެންނަމަވެސް އިދިކޮޅުގެ ވަގުތީ ލީޑަރު އަބްދުއްރަހީމް އަބްދުﷲ މިއަދު ވަނީ ނަޝީދުގެ ވާހަކަފުޅު ދޮގު ކުރައްވައި ރައީސް ޔާމީން ތާއީދު ކުރައްވަނީ ރިޔާސީ ނިޒާމަކަށްކަމަށް ވިދާޅުވެފަ އެވެ.
ރައީސް އިބްރާހިމް މުހައްމަދު ސޯލިހުގެ ސަރުކާރު އެކަށީގެންވާ މިންވަރަށް ކުރިއަށް ނުދަނީ ރިޔާސީ ނިޒާމުގެ ސަބަބުންކަމަށް ވިދާޅުވިނަމަވެސް ރައީސް ނަޝީދުގެ ވާހަކަފުޅު ހުންނެވިގޮތުން ސަރުކާރު ހިންގުމުގައި އެހެން މައްސަލަތައްވެސް ހުރިކަން ދޭހަވެ އެވެ. އެހެންނަމަވެސް ތަފްސީލެއް ނުދެއްވަ އެވެ.
ރައީސް ސޯލިހުގެ ސަރުކާރަކީ މިހާތަަނަށް ރާއްޖެ ދުށް އެންމެ "ސްލޯ" ސަރުކާރުގެ ގޮތުގައި ގިނަ ބަޔަކު ސިފަ ކުރެ އެވެ. މިހާތަަނަށް އައިއިރު އިގްތިސޯދީ ގޮތުން ބިޔަ އެއްވެސް ޕްރޮޖެކްޓެއް ސަރުކާރުން ފަށާފައި ނުވާއިރު ރައީސް ސޯލިހު ވެރިކަމުގައި ހުންނަވާތާ މިއަހަރުގެ ނިޔަލަށް ތިން އަހަރު ފުރޭނެ އެވެ. ރައީސް ސޯލިހުގެ ސަރުކާރުން މިހާތަަނަށް އަމަލީ މަސައްކަތް ފަށައި، މަސައްކަތްތައް ނިންމާލާފައިވާ ގިނަ ޕްރޮޖެކްޓުތަކަކީ ކުރީގެ ރައީސް ޔާމީންގެ ސަރުކާރުގައި ފެށި، ނުވަތަ އެއްބަސްވުން ގާއިމްކުރި ޕްރޮޖެކްޓުތަކެވެ.
