ފޮރިން މިނިސްޓަރު އަބްދުﷲ ޝާހިދާއި މިއަދު ބައްދަލު ކުރައްވައި އދގެ 76 ވަނަ އާންމު މަޖިލީހުގެ ރައީސަކަށް ހޮވިވަޑައިގެންފައިވާތީ ރައީސް އިބްރާހިމް މުހައްމަދު ސޯލިހު ތަހުނިޔާ ވިދާޅުވެއްޖެ އެވެ.
ރައީސް ސޯލިހު ޝާހިދާއި ބައްދަލު ކުރެެއްވީ މިއަދު ރައީސް އޮފީހުގަ އެވެ. ރައީސް ވަނީ ޝާހިދަށް ލިބިވަޑައިގެންނެވި ކާމިޔާބީ ފާހަގަކުރައްވައި އެމަނިކުފާނަށް ތަހުނިޔާ ވިދާޅުވެފަ އެވެ.
ރައީސް ވިދާޅުވީ ޝާހިދަށް ލިބިވަޑައިގެންނެވި ކާމިޔާބީ އަކީ ރާއްޖެއަށް ލިބުނު ބޮޑު ޝަރަފެއް ކަމަށާއި އަދި ހާރިޖީ ދާއިރާގައި ދިވެހި ސަރުކާރުން ކުރަމުންދާ މަސައްކަތްތައް ދުނިޔެ ބަލައިގަންނަކަމުގެ ހެއްކެއް ކަމަށެވެ. އަދި ޝާހިދުގެ ކާމިޔާބީއާ އެކު ބައިނަލްއަގުވާމީ މައިދާނުގައި ރާއްޖެއަށް އިތުރު ކުރިއެރުންތައް ލިބޭނެ ކަމަށްވެސް ވިދާޅުވި އެވެ.
މިނިސްޓަރު ޝާހިދާއި ރައީސް ސޯލިހު މިއަދު ބައްދަލުކުރައްވަނީ
މިއަދުގެ ބަައްދަލުވުމުގައި ޝާހިދު ވިދާޅުވީ ލިބިވަޑައިގެންނެވި ކާމިޔާބީގެ އަސްލަކީ ރައީސް ސޯލިހް ވެރިކަމަށް ވަޑައިގެން ބައިނަލްއަގުވާމީ މުޖުތަމައާއި އަލުން ގުޅުން ބަދަހިކުރައްވައި ބައިނަލްއަގުވާމީ މުޖުތަމައުގެ އިތުބާރު އަލުން ހޯއްދެވުމަށް ކުރެއްވި އަގުހުރި މަސައްކަތްތަކުގެ ނަތީޖާ ކަަމަށެވެ.
މިދިޔަ މަހު ބޭއްވި އދ ގެ އާންމު މަޖިލީހުގެ އިންތިހާބުގައި ރިޔާސަތަށް ޝާހިދު އިންތިހާބުވެވަޑައިގެންނެވިއިރު އެމަގާމާއި އޭނާ ރަސްމީކޮށް ހަވާލުވެވަޑައިގަންނަވާނީ އަންނަ ސެޕްޓެމްބަރު މަހު އެވެ.
