30 މީހުންނަށް ވުރެ މަދުން މީހުން ހިމެނޭ ގޮތަށް އިވެންޓްތަކާއި ހަފްލާތައް ބޭއްވުމުގެ ހުއްދަ އެޗްޕީއޭއިން ދީފިއެވެ.
ކޮވިޑް-19 އާ ގުޅިގެން އަޅާފައިވާ ފިޔަވަޅުތަކަށް ލުއި ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް އޮފީހުގެ ތަރުޖަމާނު މުހައްމަދު މަބްރޫކް އަބްދުލްއަޒީޒު ވިދާޅުވީ، ގައިޑްލައިންތަކާއި އެއްގޮތަށް 30 މީހުންނަށް ވުރެ މަދު މީހުން ހިމެނޭ ގޮތަށް އިވެންޓްތަކާއި އެއްވުންތައް ކުރިއަށް ގެންދިއުމަށް މާދަމާއިން ފެށިގެން ހުޅުވާލާ ކަމަށެވެ.
މީގެ އިތުރުން މިހާރު ހުރި ރިސްޓްރިކްޝަން ތައް އުވާލައި ހުރިހާ ކުޅިވަރެއް ކުޅުމަށް ހުއްދަ ދިނުމަށް ނިންމާފައިވާ ކަމަށާއި އެހެންނަމަވެސް ކުޅިވަރު މުބާރާތްތައް ބޭއްވުމަށް އަދިވެސް ހުއްދައެއް ނުދެވޭނެ ކަމަށް މަބްރޫކް ވިދާޅުވިއެވެ.
މާލެ ސަރަހައްދުގެ ކާފިއުވެސް ވަނީ މިހާރު އުވާލާފައެވެ. ނަމަވެސް ރައްކާތެރިކަމުގެ ފިޔަވަޅުތަކާއެކު ކަންކަން ކުރުމަށް އެޗްޕީއޭއިން ވަނީ އިލްތިމާސްކޮށްފައެވެ.
