ދަފުތަރުގައި ޖެހިފައިވާ ފަރާތްތަކުގެތެރެއިން ގެދޮރުވެރިކުރުމުގެ މަޝްރޫއުތަކުން ބޯހިޔާވަހިކަން ލިބިފައިވާ ފަރާތްތައް ދަފުތަރުން އުނިކުރުމަށް މާލޭ ސިޓީ ކައުންސިލުން ނިންމައިފިއެވެ.
މިމަހުގެ 7 ވަނަ ދުވަހު ބޭއްވުނު، މާލޭ ސިޓީ ކައުންސިލްގެ 4 ވަނަ ދައުރުގެ 10 ވަނަ ރަސްމީ އާއްމު ޖަލްސާގައި މިގޮތަށް ނިންމާފައިވަނީ 16 މެމްބަރުންގެ އަގުލަބިއްޔަތުން ކަމަށް އެ ކައުންސިލުން ހާމަކުރެއެވެ.
މި ނިމްމުގައިވަނީ މިގޮތަށް އުނިކުރުމައްޓަކައިކުރަންޖެހޭ އެންމެހާ މަސައްކަތްތައް ކުރިއަށް ގެންދިއުމަށެވެ. އެހެންކަމުން ދަފުތަރުގައި ޖެހިފައިވާ ފަރާތްތަކުގެތެރެއިން ބޯހިޔާވަހިކަން ލިބުނު ފަރާތްތައް ދެނެގަނެ އެފަރާތްތައް ދަފުތަރުން އުނިކުރުމުގެ މަސައްކަތް ކުރިއަށް އޮތް ތާންގައި ކުރިއަށް ގެންދިއުމަށް ވަނީހަމަޖެހިފައެވެ.
މި ޖަލްސާގައި ނިންމި މުހިއްމު އަނެއް ނިންމުމުގައިވާގޮތުން މައިމުޅަވެފައިވާ ފަރާތްތަކަށް ބޯހިޔާވަހިކަން ހޯދައިދިނުމަށްޓަކައި މަސައްކަތްކުރުން ހިމެނެއެވެ. އެގޮތުން ފުރަތަމަ ކަމެއްގެ ގޮތުން މާލޭ ސިޓީގެ ރައްޔިތުންގެތެރެއިން މައިމުޅަވެފައިވާ ފަރާތްތައް ދެނެގަތުމަށް ކައުންސިލްގެ މިޖަލްސާގެ އިއްތިފާގުންވަނީ ފާސްކޮށްފައެވެ.
މައިމުޅަވުމަކީ އަންހެން ދަރީގެ ދަރީންނަށް ވާރުތަމުދަލުން ނުލިބޭ ޙާލަތް ދިމާވުމެވެ. މިގޮތަށް ދިމާވަނީ މައިންބަފައިން ދުނިޔޭގައި ތިއްބައި އަންހެންދަރި ނިޔާވުމުންނެވެ.
