ރައްޔިތުންގެ މަޖލީހުގެ ރައީސް، މުހައްމަދު ނަޝީދަށް އަމާޒުކޮށްގެން ދީފައިވާ ޓެރަރިސްޓް ހަމަލާއާއި ގުޅިގެން، ކުރިޔަށްދާ ތަހުގީގު ގާތުން ބެއްލެވުމަށްޓަކައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ޢައްޔަންކުރައްވާފައިވާ ޚާއްޞަ މަންދޫބު، އައްބާސް ފާއިޒް ރައީސް އާއި ބައްދަލު ކުރައްވައިފި އެވެ.
މިއަދު ހެނދުނު އޮތް މި ބައްދަލުކުރެއްވުމުގައި އައްބާސްގެ އެންމެ ފަހުގެ މަސައްކަތްތަކާއި ގުޅޭގޮތުން ރައީސް ސޯލިހަށް މައުލޫމާތު އެރުވި އެވެ.
ރައީސް އޮފީހުން ބުނީ އަދި މި ބައްދަލުކުރެއްވުމުގައި އައްބާސް ފާއިޒް ވަނީ ހާއްސަ މަންދޫބެއްގެ ހައިސިއްޔަތުން މި ވޭތުވެ ދިޔަ ދުވަސްތަކުގައި ކުރައްވާފައި މުހިންމު މަސައްކަތްތަކާ އަދި ކުރިޔަށް މަސައްކަތްތައް ރާވާލައްވާފައިވާ ގޮތުގެ މަޢުލޫމާތުތައް ވެސް ރައީސާއި ހިއްސާ ކުރައްވާފައި ކަމަށެވެ.
މިއަދުގެ ބައްދަލުކުރެއްވުމުގައި ރައީސް ސޯލިހު ވިދާޅުވީ، ރައީސް ނަޝީދަށް ދިން ހަމަލާއާއި ގުޅޭ ޝަރީއަތްތައް ވީހާވެސް ދެފުށް ފެންނަ ގޮތަކަށް ކުރިއަށް ގެންގޮސް އިންސާފު ގާއިމް ކުރުމަށް އެދިވަޑައިގަންނަވާކަމަށެވެ.
ރައީސް ނަޝީދަށް މިދިޔަ މެއި މަހުގެ 6 ވަނަ ދުވަހު ދިން ހަމަލާގެ ތަހުގީގުގެ ހާއްސަ މަންދޫބެއްގެ ގޮތުން އައްބާސް ފާއިޒު ކަނޑައެޅުއްވީ މެއި 19 ވަނަ ދުވަހު އެވެ. އައްބާސް ފާއިޒު މަސައްކަތް ކުރައްވާނީ ޕްރޮސެކިއުޓާ ޖެނެރަލް ކަނޑައަޅުއްވާ ވަކި ހުދޫދެއްގެ ތެރެއިންނެވެ.
