މިއަދު އެކަނިވެސް ހަތްހާހަށްވުރެ ގިނަ މީހުން ވެކްސިންގެ ދެވަނަ ޑޯޒް ޖަހައިފިއެވެ.
އެޗްޕީއޭގެ ތަފާސް ހިސާބުތަކުން ދައްކާގޮތުން މާލެ ސަރަހައްދުން މިއަދު ދެވަނަ ޑޯޒް ޖެހީ 4،051 މީހުންނެވެ. އަތޮޅުތެރެއިން ދެވަނަ ޑޯޒް ޖެހީ 3،156 މީހުންނެވެ. މިއާއެކު ވެކްސިންގެ ދެވަނަ ޑޯޒް މުޅި ރާއްޖެއިން ޖެހި މީހުންގެ އަދަދު ވަނީ 235،615 އަށް އަރާފައެވެ. މިއީ ދިވެހިން އަދި ބިދޭސީން ވެސް ހިމެނޭގޮތުންނެވެ. މުޅި ރާއްޖެއިން ވެކްސިން ޖެހި މީހުންގެ އަދަދަކީ 318،756 އެކެވެ.
މިއަދު ވެކްސިންގެ ފުރަތަމަ ޑޯޒް ޖަހާފައިވަނީ 306 މީހުންނެވެ. އެހީ މާލެ ސަރަހައްދުން 240 މީހުންނާއި އަތޮޅު ތެރެއިން 66 މީހުންނެވެ.
މިދިޔަ އަހަރުގެ ނިޔަލަށް ރާއްޖޭގެ އާބާދީއަކީ 568،362އެވެ. މީގެތެރެއިން 385،696 އަކީ ދިވެހިންނެވެ. އަދި 182،666 އަކީ ބިދޭސީންނެވެ. އެހެންނަމަވެސް ވެކްސިންޖެހި ދިވެހިންނާއި ބިދޭސީންގެ އާބާދީއެއް އެޗްޕީއޭއިން އަދި ހާމައެއް ނުކުރެއެވެ.
