ރައީސް އިބްރާހިމް މުހައްމަދު ސޯލިހާއިއެކު ސިޔާސީ ގޮތުން ހުންނެވެން ނެތް ކަމަށާއި އެމްޑީޕީއަށް އައު އިއްތިހާދެއްގެ ބޭނުން ޖެހިފައިވާކަަމަށް އެޕާޓީގެ ރައީސް މުހައްމަދު ނަޝީދު ވިދާޅުވުމުން އެކަމާ އެއްވެސް އެއްޗެއް ވިދާޅުވާން ބޭނުން ނުވާކަން ރައީސް އޮފީހުގެ ތަރުޖަމާނު މަބުރޫކު އަޒީޒު ވިދާޅުވެއްޖެ އެވެ.
އެމްޑީޕީގެ ވަޓްސް އެޕް ގްރޫޕުގައި ނަޝީދު އިއްޔެ ވިދާޅުވީ ރައީސް ސޯލިހާއި ހުރި ފިކުރީ ތަފާތުތަކެއްގެ ސަބަބުން ސިޔާސީ ގޮތުން އެމަނިކުފާނާއިއެކު ހުންނެވެން ނެތްކަމަށެވެ. އެވާހަކަތައް ތަފްސީލު ކޮށްދެއްވަމުން މިއަދު ވިދާޅުވީ އެމްޑީޕީއަށް އައު އިއްތިހާދެއްގެ ބޭނުން ޖެހިފައިވާ ކަމަށެވެ.
މިކަމާއި ގުޅިގެން މީޑިއާއަކަށް ދެއްވި އިންޓަވިއުއެއްގައި މަބުރޫކު ވިދާޅުވީ ރައީސް ސޯލިހުގެ ހަމައެކަނި ވިސްނުންފުޅަކީ ރިޔާސީ ވައުދުތައް ފުއްދުން ކަމަށެވެ. އިތުރު އެއްވެސް ކަމަކަށް ރައީސްގެ ފޯކަސް ނެތްކަމަށް މަބުރޫކު ވިދާޅުވި އެވެ.
މިފަހަކަށް އައިސް ގައުމުގައި ސިޔާސީ ގޮތުން ދިމާވާ ކޮންމެ މައްސަލައެއްގައި ރައީސް ވިދާޅުވަނީ މިފަދައިންނެވެ.
ބޭނުންވަނީ ނަފުރަތުގެ ބިލަށް ތާއީދު ކުރާ އިންޑިއާ އައުޓު ނުގޮވާ ބަޔަކު: ނަޝީދު
އެމްޑީޕީއަކީ ފެށުނީއްސުރެއްވެސް ރައީސް ނަޝީދުގެ މެޖޯރިޓީ ތާއީދު އޮންނަ ސިޔާސީ ޕާޓީއެކެވެ. އެޕާޓީގެ އާންމު މެމްބަރުން އެނބުރެނީ އެމަނިކުފާނުގެ ފަހަތްޕުޅުންނެވެ. މިއާއެކު ދޭތެރެ ދޭތެރެއިން ޕާޓީގެ ލީޑަޝިޕްގެ ބޭފުޅުން ބަދަލު ކުރައްވަނީ ނަޝީދު ބޭނުންވެ ވަޑައިގަންނަވާ ގޮތަށެވެ.
މީގެ ކުރިން އެމްޑީޕީގެ ރައީސް ކަމުގައި ނައިބު ރައީސް ކަމުގައި ތިއްބެވި ބޭފުޅުން ނަޝީދާއި ހިޔާލު ތަފާތުވުމުން ޕާޓީން ބޭރު ކުރި އެވެ. އެހެންނަމަވެސް މިފަހަރު މި އުފެދިގެން އުޅޭ ކޯޅުންގަނޑުގެ ތެރޭގައި އާންމު މެމްބަރުންވެސް ދެބަޔަކަށް ބެހޭނެ ކަމަށް ބެލެވެ އެވެ. އަނެއްކޮޅުން ލީޑަޝިޕްގެ ބޮޑު ބައެއްވެސް ރައީސް ސޯލިހުގެ ކޮޅު ނަންގަވާނެ ކަމަށް އޮތީ ބެލެވިފަ އެވެ.
ރައީސް ނަޝީދު އިއްޔެ ވަނީ އިދިކޮޅު ޕީޕީއެމްއާ މަޝްވަރާކޮށް ރައީސް އަބްދުﷲ ޔާމީންގެ އެހީތެރިކަމަށް އެދިވަޑައިގަންނަވާނެކަމަށްވެސް ވިދާޅުވެފަ އެވެ. މިއަދު ނަޝީދު ވިދާޅުވީ ބޭނުންވަނީ އިންޑިއާ އައުޓު ނުގޮވާ، ނަފުރަތުގެ ބިލަށް ތާއީދު ކުރާ އަދި މިޔުޒިކު ހަރާން ނުކުރާ ދީނަށްވެސް ފުރައްސާރަ ނުކުރާ މީހުން ކަމަށެވެ. އެމްޑީޕީއާއި ޕީޕީއެމްގެވެސް ގިނަ މެމްބަރުން ތިބީ އެފިކުރުގައި ކަމަށް ނަޝީދު ވިދާޅުވި އެވެ.
ނަޝީދު ވިދާޅުވި ގޮތުގައި ރާއްޖެ އަފްގާނިސްތާނަށް ވިޔަ ނުދިނުމަށް އެމަނިކުފާނު މަސައްކަތް ކުރައްވާނެ އެވެ.
