ކޮވިޑް-19 ގެ ސަބަބުން ރާއްޖެއަށާއި އިންޑިއާއަށް ދިމާވެފައިވާ އިގްތިސޯދީ އަނދަވަޅުން އަރައިގަތުމަށް ކުރެވިދާނެ މަސައްކަތްތަކާއި ގުޅޭގޮތުން ރައީސް އިބްރާހިމް މުހައްމަދު ސޯލިހު އާއި އިންޑިއާގެ ބޮޑުވަޒީރު ނަރެންދުރަ މޯދީ މިއަދު މަޝްވަރާ ކުރައްވައިފި އެވެ.
މިއަދު މެންދުުރު ފޯނު މެދުވެރިކުރައްވައި ބޭއްވި މި މަޝްވަރާއާއި ގުޅިގެން ބޮޑުވަޒީރު މޯދީ ވިދާޅުވީ ކޮވިޑުގެ ހާލަތުން އަރައިގަތުމަށް ރާއްޖެއިން ކުރަމުންދާ މަސައްކަތުގައި އިންޑިއާއިން ފުރިހަމަ އެއްބާރުލުން ދޭނެކަމުގެ ޔަގީންކަން އަރުވާފައިވާ ކަމަށެވެ. މީގެ އިތުރުން އިންޑިއާއިން ރާއްޖޭގައި ހިންގާ ތަރައްގީގެ މަޝްރޫއުތަކާ ގުޅޭގޮތުންވެސް މަޝްވަރާގައި އަލިއަޅުއްވާލެއްވި ކަމަށް މޯދީ ވިދާޅުވި އެވެ.
މިއަދު ފޯނު މެދުވެރި ކުރައްވައި މޯދީ ވަނީ، އދ. ގެ އާންމު މަޖިލީހުގެ ރައީސްކަމަށް ރާއްޖޭގެ ފޮރިން މިނިސްޓަރު އަބްދުﷲ ޝާހިދު އިންތިހާބުވެފައިވާތީ އެކަމަށް ރައީސަށާއި ދިވެހި ސަރުކާރަށް މަރުހަބާ ވިދާޅުވެފަ އެވެ.
މި މަޝްވަރާއަށްފަހު ރައީސް ސޯލިހު ވިދާޅުވީ ރާއްޖެއާއި އިންޑިއާއިންވެސް ކޮވިޑުގެ ހާލަތުން އަރައިގަތުމަށް ގިނަ މަސައްކަތްތަކެއް ކުރެވެމުން ދާއިރު އެކަމާއި ގުޅިގެން މިއަދު މަޝްވަރާ ކުރެވުނު ކަމަށެވެ. އަދި ބަލިމަޑުކަމުގެ ސަބަބުން އިގްތިސޯދަށް އަރާފައިވާ ލޮޅުންތަކުން އަރައިގަތުމަށް ކުރެވިދާނެ ކަންކަމާއި ގުޅޭގޮތުންވެސް ވާހަކަފުޅު ދެއްކެވިކަމަށް ރައީސް ވިދާޅުވި އެވެ.
ރައީސް ސޯލިހުގެ ސަރުކާރު އިންތިހާބުވުމަށްފަހު އިންޑިއާ ސަރުކާރާއިއެކު އަންނަނި އިންތިހާ ގާތް ގުޅުމެއް ބާއްވަމުންނެވެ. އެގޮތުން މިސަރުކާރުން ވަނީ ރެކޯޑު އަދަދަކަށް އިންޑިއާ މެދުވެރިކޮށް އެކި ނަންނަމުގައި ލޯނު ނަގައިފަ އެވެ. މިސަރުކާރުން އިއުލާނުކުރި އެންމެ ބިޔަ މަޝްރޫއު "ތިލަމާލެ ބްރިޖު" ގެ މަސައްކަތަށްވެސް ލޯނު ނެގީ އިންޑިއާއިންނެވެ. 400 މިލިއަން ޑޮލަރުގެ ލޯނުގެ އިތުރުން 100 މިލިއަން ޑޮލަރުގެ ހިލޭ އެހީވެސް އިންޑިއާއިން މި މަސައްކަތަށް ފޯރުކޮށްދޭނެ އެވެ.
މީގެ އިތުރުން 800 މިލިއަން ޑޮލަރުގެ ކްރެޑިޓް ލައިނެއްވެސް ރާއްޖެއަށް ވަނީ ދޫކޮށްފަ އެވެ. އެފައިސާއިން އައްޑޫ ސިޓީގެ ބައެއް ޕްރޮޖެކްޓުތައް ހިންގާނެކަމަށް ސަރުކާރުން ވަނީ ބުނެފަ އެވެ.
އިންޑިއާއިން ރާއްޖެއަށް ގިނަ އަދަދެއްގެ ލޯނުތައް ފޯރުކޮށްދެމުން ދާއިރު އެގައުމުގެ ސިފައިން ރާއްޖޭގައި ތިބޭ މައްސަލަ ވަނީ ހޫނުވެފަ އެވެ. މީގެ އިތުރުން އައްޑޫ ސިޓީގައި ދަނީ އިންޑިއާގެ ކޮންސިއުލޭޓެއް އެޅުމުގެ މަސައްކަތް ކުރަމުންނެވެ. މިކަން އިއުލާން ކުރީވެސް އިންޑިއާ ސަރުކާރުންނެވެ. ރާއްޖެއިން ސީދާ ވަކި ގޮތެއް މިކަމާއިމެދު ނުނިންމިޔަސް ސަރުކާރުގެ ވިސްނުން ހުރީ އެ މަސައްކަތަށް ހުއްދަ ދޭށެވެ.
