އަޟްހާ އީދު ބަންދުގައި ކޮވިޑް ދިފާއު ވެކްސިން ޖެހުން މެދުކަނޑާލަން ނިންމާފައިވާ ކަމަށް ހެލްތް ޕްރޮތެކްޝަން އެޖެންސީން ހާމަކޮށްފިއެވެ.
އެޗްޕީއޭގެ ޕްރެސްކޮންފަރެންސެއްގައި ވާހަަކަފުޅު ދައްކަވަމުން ޑރ. ނަޒްލާ ރަފީގް ވިދާޅުވީ، މާލެ ސަރަހައްދުގައި (މާލެ، ހުޅުމާލެ، ވިލިމާލެ)ގައި ވެކްސިން ޖެހުމުގެ ޕްރޮގްރާމް ކުރިއަށް ގެންދާނީ 15 ވާ ބުރާސްފަތި ދުވަހުގެ ނިޔަލަށް ކަމަށެވެ. ބުރާސްފަތި ދުވަހުގެ ފަހުން ވެކްސިން ޖެހުން އީދު ބަންދު ނިމެންދެން މެދުކަނޑައިލާނެ ކަމަށް ޑރ ނަޒްލާ ވިދާޅުވިއެވެ.
އަދި ވެކްސިން ޖެހުން ހުޅުވާނެ ތާރީހެއް ފަހުން އިއުލާނު ކުރާނެ ކަމަށާއި އޭގެ ކުރިން އެޕޮއިންޓްމަންޓް ހެއްދުމަށްވެސް ހުޅުވާލާނެ ކަމަށެވެ.
ސަރުކާރުން މިހާރު އިއުލާންކޮށްފައިވާ ގޮތުން އީދު ބަންދާ މިނިވަންދުވަހުގެ ބަންދާއެކު ޖުމުލަ 16 ދުވަހުގެ ބަންދެއް ހުކުރުން ދުވަހުން ފެށިގެން ލިބޭނެއެވެ. އަދި މި ބަންދަށް ފަހު ދެން ސަރުކާރު ހުޅުވުމަށް ނިންމާފައިވަނީ އޮގަސްޓް މަހުގެ އެއްވަނަ ދުވަހުއެވެ.
