ހުޅުމާލޭ ސާމްޕަލް ނަގާ ސެންޓަރުގެ ހިދުމަތް ވަގުތީ ގޮތުން މެދު ކަނޑާލުމުން ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ކަންބޮޑުވުން ފާޅުކުރައްވައިފިއެވެ.
އެޗްޕީއޭއިން ބުނެފައިވަނީ ގްރޭޓަރ މާލެ ސަރަހައްދުގައި ހުރި ކޮވިޑް ސާމްޕަލް ނަގާ މި ސެންޓަރު ބަންދުކޮށް، އެހެން ސެންޓަރުތަކުން ހިދުމަތްދޭ ގަޑިތަކަށް ބަދަލުގެނެސްފައިވާ ކަމަށެވެ. ނަމަވެސް ވަގުތީ ގޮތުން ހިދުމަތް މެދުކަނޑާލި ސަބަބެއް އެޗްޕީއޭއިން ހާމައެއް ނުކުރެއެވެ.
ޝުޖާ ކުރެއްވި ޓުވީޓެއްގައި ބުނެފައިވަނީ މާލެ ސިޓީގެ އެންމެ ބޮޑު އަވަށް ކަމުގައިވާ ހުޅުމާލޭގައި ކޮވިޑް ޓެސްޓް ހެދޭނެ ގޮތެއް ނެތް ކަމަށާއި ދާއިރާގެ ރައްޔިތުން ގުޅީމަ ޓެސްޓް ހަދަން ބޭނުމިއްޔާ މާލޭގެ ސޯޝަލް ސެޓަރާއި، ވިލިމާލެ އަށް ދާށޭ ބުނަމުންދާ ކަމަށެވެ. އަދި ހުޅުމާލޭގެ އެތައް ރައްޔިތެއް ތިއްބެވީ ޗުއްޓީ އަށް އަތޮޅުތެރެއަށް ނުފުރި ރަށުބަންދު ވެފަ ކަމަށާއި މިކަމަށް އަވަސް ހައްލެއް ހޯދާ ދިނުމަށް ޝުޖާ ވަނީ އެދިވަޑައިގެންފައެވެ.
ހުޅުމާލެ ދާއިރާގެ ރައްޔިތުން ނަކީ ޚިދުމަތުން މަހުރޫމް ވެފަ ތިބި ރައްޔިތަކަށް ވާން ނޭދޭ ކަމަށްވެސް ޝުޖާއު ވިދާޅުވިއެވެ.
