މާލެ ސަރަހައްދުގެ މާލެ، ހުޅުމާލެ އަދި ވިލިމާލޭގެ ވެކްސިންދޭ ސެންޓަރުތައް މާދަމާއިން ފެށިގެން ބަންދުވާނެ ކަމަށް އެޗްޕީއޭއިން ހާމަކޮށްފިއެވެ.
ހެލްތް ޕްރޮޓެކްޝަން އެޖެންސީން މީގެ ކުރިން ބުނެފައިވަނީ ގްރެޓަރ މާލެ ސަރަހައްދުގެ ވެކްސިންދޭ ސެންޓަރުތައް އީދު ބަންދަށް ބަންދު ކުރާނެ ކަމަށެވެ.
އެޗްޕީއޭގެ ޕްރެސްކޮންފަރެންސެއްގައި ވާހަަކަފުޅު ދައްކަވަމުން ޑރ. ނަޒްލާ ރަފީގް ވިދާޅުވީ، މާލެ ސަރަހައްދުގައި (މާލެ، ހުޅުމާލެ، ވިލިމާލެ)ގައި ވެކްސިން ޖެހުމުގެ ޕްރޮގްރާމް ކުރިއަށް ގެންދާނީ 15 ވާ ބުރާސްފަތި ދުވަހުގެ ނިޔަލަށް ކަމަށެވެ.ނަމަވެސް މިއަދުވެސް ވަނީ ވެކްސިން ސެންޓަރުތަކުގައި ވެކްސިން ޖެހުން ކުރިއަށް ގެންގޮސްފައެވެ.
ވެކްސިން ޖެހުން ހުޅުވާނެ ތާރީހެއް ފަހުން އިއުލާނު ކުރާނެ ކަމަށާއި އޭގެ ކުރިން އެޕޮއިންޓްމަންޓް ހެއްދުމަށްވެސް ހުޅުވާލާނެ ކަމަށް އެޗްޕީއޭއިން ވަނީ ހާމަކޮށްފައެވެ.
ސަރުކާރުން މިހާރު އިއުލާންކޮށްފައިވާ ގޮތުން އީދު ބަންދާ މިނިވަންދުވަހުގެ ބަންދާއެކު ޖުމުލަ 16 ދުވަހުގެ ބަންދެއް ހުކުރު ދުވަހުން ފެށިގެން ލިބޭނެއެވެ. އަދި މި ބަންދަށް ފަހު ދެން ސަރުކާރު ހުޅުވުމަށް ނިންމާފައިވަނީ އޮގަސްޓް މަހުގެ އެއްވަނަ ދުވަހުއެވެ.
